Iron tlakchhamna hian sam-ah langsar khawpin harsatna a thlen rang hle a, sam a chak lova, a tla awlsam hle. Tui in tam la, thlai hring leh eng lam ei tam la, thlai rah ei that a pawimawh bawk.
Protein tamna heng – Artui, bekang (um loh), cheese leh bawnghnute te hi taksaa lakluh that tur a ni a, hei hian sam tan chakna nasa tak a thlen.
Ei leh inah khan zinc, selenium, biotin leh fatty acid te an awm tha tawk tur a ni a, hengte hian sam an tithang chak thei hle.
Duat takin sam enkawl thin tur a ni a, samkhuih hman chungchangah fimkhur hle a ngai. Vawikhat i khuiha a tan avanga phih lawp lawp tur a ni lo.
Sam hmawr phiar a, lo sawisak vel hi kut hlei thil thu-ah nuam viau angin lang mah se, a nihna takah chuan sam tithla thei a ni a, ‘Traction Alopecia’ a lo awm theih bawk avangin pumpelh tur a ni.
Sam tihro hi hmanhmawh thil thu-ah tangkai viauin lang mah se, chin dawk lak awm thei a ni a, thil hlum (heat)-a hem fo emaw nawh thin hian sam a tichhe thei a, reilote-ah a tla i buaipui zui ang
Ni sa hnuaiah i kal dawnin lukhum emaw nihliap nen inring ang che. Ni zung atanga lo chhuak UV rays hi a hlauhawm hle a, sam a tihchhiat bakah tuak hma-na a thlen thei.
Swiming pool-a hman thin ‘chlorine’ hi sam tan a hlauhawm em em a, chuvang chuan swimming pool-a i chen hmâ khan i lu kha tuam tha hle la, inbual hnu-ah tui thianghlim-a pâwn lama intleuh fai leh ngei ngei tur a ni.
Ruah sur hnuaia huh hnep pawh hi a theih chuan pumpelh a tha. Ruahtui hian chemical chi hrang hrang a pai thei a, chu chuan sam a tichhe hmâ bik hle.
Lu vun hi dim te te leh duat taka hmeh (massage) thin ni se a tha a, hei hian thisen kal vel a ti that bakah sam a thang chak a, a tihrisel thei bawk.
Sam i khuih reng rengin dim dawi hle la, khuih vak vak hian lû a tihai thei a, tihfuh loh phei chuan lu vun a na a, lu na benvawn neih theihna hial a ni a, sam kak a siam thei bawk.
Vitamin supplement i ei kha hriatchian hmasak a pawimawh a, mahni thu-a damdawi inchawh phei chu tih loh tawp tur a ni. A bik takin, Vitamin A ei tam hian sam-in a tuar hle.
Thau tihtlem nan emaw rit lutuk tihniam nana in ‘diet’ a, rihna tihhniam chiam hi sam hian a tuar hle a, fimkhur a ngai.
Shampoo lei dawn pawhin i sam awmdan i hriatchian hmasak a ngai a, mild shampoo leh conditioner thlan chungchangah fimkhur hle ang che.
Sam mawi le tle nalh tak nei duh bawk, lehlamah meizial nghei thei lo bawk i nih chuan ‘awmze bo tawp’ thil i buaipui tihna a ni a, nghei hmak tur.
Antioxidant chak tak- Vitamin C, E leh Beta Carotene te hi sam than nan an thawh hlawk.
Rilruhah, tawt leh phawk lek chiam thinna hi pumpelh theih a ni loh vek pawhin thunun hram hram tum thin tur a ni a, sam tlakna chhan lian tak a ni si a.