- Ruata
India rama Toyota lirthei hralhchhuaktu leh siamtu Toyota Kirloskar Motor chuan kumin chhoah hian lirthei thar pahnih an tichhuak dawn a, hetah hian Hyundai Creta leh Kia Seltos te rawn el tur midsize SUV thar a tel dawn a, a hmingah Hyryder a nih beisei a ni.
Toyota-in lirthei thar pahnih an tihchhuah tur hi tunhnaiah a darh nasa hle a. Toyota hian India rama lirthei hralhtur ‘Toyota Hyryder’ tih chu India sorkar hnuaiah an ‘trademark’a. Tunhnaiah hian Maruti Suzuki leh Toyota tangkawp hian mid-size SUV an buaipui mek tih kan hre tam tawh viau a. Hei vang hian he company pahnih thawhdunnaa lirthei thar hlak siamchhuah hmasak ber tur hming tur hi ‘Hyryder’ hi a nih rinna a lian hle a, a dik ngei pawh a rinawm a ni.
Hei bakah hian Toyota in lirthei an tihchhuah tur pahnih kan sawi zinga a dangleh chu an MPV huanga an lirthei lar leh tha em em, Innova a ni a. Innova hi a chi thar, new generation model tichhuak turin an inbuatsaih mek niin a lang.
Facelift ni lovin a chhuan thar (new generation) meuh a nih dawn avangin Toyota Innova Crysta tuna kan hmuh mek ai hian a danglam dawrh a beiseiawm a. Tunlai leh mawi thei ang berin Innova hi kan hmu chho dawn a nih hmel a ni.
Toyota Hyryder/midsize SUV
Toyota leh Maruti Suzuki hian thawhdunna (joint venture) an nei tih chu hman atangin kan hre tawh awm e. Tuna kan hmuh theihah pawh lirthei chhuak mek sa rebadge te kan hmu a ni a. Hei hi a awmzia chu a lirthei ngai reng kha company pakhat zawkin hming thar vuahin an company lirthei angin an tichhuak ve tihna a ni. Maruti Suzuki Brezza chu Toyota in a lirthei ngai chiah kha Toyota Urban Cruiser tiin an tichhuak a. Hei bakah hian Maruti Suzuki Baleno chhuak mek ang chiah Toyota Glanza kan hmu bawk a. Hei hi an thawhdunnaa lirthei chhuak kan hmu mek te an ni.
Toyota leh Maruti Suzuki tangkawpin midsize SUV (Hyryder?) an rawn siamchhuah tur erawh hi a khawi emaw zawk zawk mahin hetiang lirthei hi India ram market-ah an nei sa lo a. An pahnih tangkawpa lirthei thar hlak an siamchhuah tur hmasa ber a ni dawn a ni. Sawi tawh angin he SUV thar tur hian tunlaia SUV huanga lirthei hralh kalna em em midsize SUV huanga lirthei chhuak mek Hyundai Creta, Kia Seltos, Skoda Kushaq leh Volkswagen Taigun te a rawn el dawn a ni. Hei hi company lar leh hlun si Maruti Suzuki leh Toyota in India ram market-a lirthei an neih ve miah lohna huang a ni a, an company pahnih tana hmunawl chu a rawn luah tha dawn viau a. Maruti Suzuki lam hian chanchin an la nei lutuk rih lo thung a ni.
Company pahnih thawhdunnaa duan tur lirthei a nih angin a lirthei part pawh company pahnihin an supply rawn ang a. Toyota hian a lirthei siamna tur hmanraw thenkhat an thawh dawn tihlohah chuan a tam zawk hi Maruti Suzuki kut tur a nih thu report thenkhat chuan an tarlang bawk.
He SUV thar tur hi India ram tana siam danglam Toyota TNGA-B (or DNGA) platform nghahchhana duan tur a ni dawn a. Toyota Hyryder ni tura ngaih he SUV thar tur hian hybrid powertrain a rawn nei ang a, hetah hian petrol khawl chi hnih – mild leh strong hybrid technology nei te duhthlan tur a awm dawn a ni.
Design lamah chuan khawvel huapa chhuak mek Toyota Corolla Cross nghahchhan deuha duan tur a nih hmel a. Maruti Suzuki lirthei kan hmuh sa nena khaikhin chuan a design pawh a danglam deuh hlek dawn niin report tam tak chuan an tarlang a ni. He SUV leh an MPV chhuak sa Innova thar tur hi kan hmu thuai dawn niin a lang a. Chiang, fiah leh kimchang zawkin he SUV lo chhuak tur pawh hi a chanchin kan hre deuh deuh turah beisei ila a tha awm e.