Aizawl: MNF Thorang Block-I chuan Mizoram sorkar flagship programme, SEDP hnuaia agriculture department-in Lungsen leh a chhehvela fu chi a sem chungchangah thudik tawk lo a darh chu pawi an tih thu an sawi.
Nimina thuchhuah an siamah May 27, 2022 khan Lungsen leh a chhehvel khuaa fu chi sem chungchangah thudik tawk lo a darh chu pawi an tih thu sawiin, “Fu chi dawngtute hian anmahni duhthlanna ngei a fu chin hi thlang an ni a. Fu chite hi an paih lo a an thenna leh an singsakna hnawk an paih mai niin fu chi dawngtute hian an sawi a. Hetiang thu dik tawk lo a darh ta vak mai hi mak an ti hle a ni,” an ti.
MNF Thorang Block-I chuan fu chi a phurhna leh lakkhawmna a hlat tham bakah tun hnai ruah surah a phurtuten harsatna an tawh nasat avangin a hmelhmang mawi lo deuh a awm laiin a tam zawk erawh chintlak a nih thu leh a chawrna tur a mit pawh a tlangpuiin a tha thawkhat a, fu chin thlangtute pawh an lawm hle tih an sawi.