Serchhip Dinthar venga Zobiaksanga’n a nupui kutthlaka a sawisa hlum chu an dem tih MHIP Sub-Hqrs., Serchhipin an sawi.
An thuchhuahah MHIP Sub-Hqrs., Serchhip chuan hmeichhiate chunga hleilenna leh tharum thawhna an dodal tlat laia Rosangzuali chunga thihna khawp hiala tharum thawhna a thleng hi an hmeichhiatpuite chungah thleng nawn tawh lo se an tih tih an sawi a. An member, Rosangzuali thihnaa mawhphurtu nia ngaih Zobiaksanga hi a na thei ang bera hramna pe turin thuneitute an phut tih an sawi.
Mizoram Pradesh Congress Committee Gen. Hqrs pawhin Rosangzuali chu sawisak a nih hnuah rawng taka thah a ni chu pawi an tih thu leh a kalsan tak a fate leh a chhungte thinlung taka an tawrhpui thu an sawi a. Pawikhawihtu hi thuneituten a phu ang tawk hremna pe ngei tura an phut thu an sawi bawk.