Rimawi:
Hei hi thil pawimawh tak a ni a, naupai lai hian rimawi soft leh cool tak tak mai a tam thei ang bera ngaihthlak thin tur a ni. Hei hian chhula awm naute-ah nghawng duhawm tak thlenin hahdamna mak tak a lo chang thin a, naute neih hnu thleng pawhin music mawi tak hmanga awi mut dan zir ngei bawk ang che.
Ei leh In:
Chawtha leh hrisel ei a pawimawh a. Hetiang hunah hi chuan thawmhnaw leh thil danga pawisa hman vak vak aiin ei leh in-a lam han duhtui deuhte pawh a finthlak zawk a ni. Riltam renga awm a tha lova, mut dawn ruaia thil ei nghek te pawh a tihchi chuang lova, hunbi nei takin ei in- in thin ang che.
Mut:
Zanah engtia mut tur nge ni ta ang? Mut thluan hi a pawina tehchiam a awm loh laiin a rei chuan kawng na leh taksa rihna-ina hnungzang ruh a delh reng avangin reiloteah insawiselna a awm duh hle. Chuvang chuan, i mu a nih pawhin a seisir zawngin ni thei se, duhthusamah chuan vei lam hawi thin ang che. Hei hian naute-in a mamawh tawk oxygen a lo hip lut thei a, awmze thui tak a nei.
Ruihtheih thil:
Hemi hun chhung hian Zu leh Zial, ruihtheihthil reng reng tih loh tawp tur a ni a. Tutute emawin ‘Wine’ te hi a tha a nia, an tih pawhin ‘Ka ti ve ngai lo’ tiin huaisen takin hnar fithla hmak rawh. Nimahsela, insum thei ngang lo i nih chuan Doctor remtihna lain tlem te chauh in ang che. Dik tak chuan thei tui te pawh hi a la thlanawm daih zawk a, coffee nokhat aiin juice nokhat i hlawkpui hrim hrim ang.
Taksa insawizawi:
Zing boruak fim tak hnuaia hla vak lo ke-a kal hi a tha ber. Tlan chiam emaw zuan vak vakte hi a tihchi reng reng loh. Chutih laiin, insawi-zawina i neih hmain doctor thurawn la phawt la, a chhan chu taksa hriselna hi mahni mai chuan hriat chian a harsat vang a ni.
Lehkhachhiar:
Hahdam taka lehkha chhiar veng veng hi naupai tan hian a nia a tangkai em em ni. Hei hian naute-ah pawh ‘literature’ lama tuina leh ngaihven châkna riau a tuh thei tlat. Mi chawktho leh chhelna pe thei ang chi te, fiamthu thianghlim tak tak awmna te chhiar thin tur a ni a. Cowboy leh tharum thawhna mai bakah ngaihtuah vung vung theih tur ang chi te erawh chhiar loh a him.
Silh leh Fen:
Taksa rihna lo thlang zel leh Dul in hmasawn lam a pan tak zel avang hian silh leh fen hak chungchangah fimkhur a ngai hle a. Hetiang hunah hian tawt (tight) lutuk emaw chhah lutuk ang chi inbel loh a tha a, fân thei emaw pan lam pang ni thei se. Chet vel tiharsa khawp ang chi-a inchei loh tur a ni a, pheikhawk sang te phei chu bun loh a tha.
Rilru thianghlim:
Mi huat neih reng mai te, lungawi lo hmel put reng maite leh vuivai na tur zawn reng mai hian rilru thianghlim putna tur-ah harsatna thlenin, hei hian taksa leh rilru mai bakah naute thlengin a tikhawlo vek thei a, rilru thianghlim leh eng-thawl put hram a tha. Thil a thalam zawnga thlir hram tum tur a ni a, chhungte leh chung lam puihna dil a pawimawh.