Kumin nipuia Nottingham Forest atanga Elliot Anderson la lut turin Manchester City dinhmun a tha ber a. City bakah hian club lian dang, Manchester United leh Arsenal pawh lak luh duh zingah hian an tel a, Etihad a pan ngei dawn niin an ring hle.
Kum 23 mi England international hi July, 2024-a £ maktaduai 35-a Newcastle United atanga Nottingham Forest-in an lei hnu khan Premier League club thenkhatte mit a la hle a. Thomas Tuchel-a leh England tana World Cup-a inlan tam tura beisei, Anderson-a chungchangah hian World Cup hma nge a hnuah inremna siam theih ni dawn tih erawh nghah a la ngai rih a ni.
City Ground-a Anderson-a contract hian June, 2029 thleng a daih a, a man pawh a sang viau tura ngaih a ni a. A man san belh a nih theih chhan tur chu central midfielder tha chungchuang tia sawi, Sandro Tonali, Adam Wharton, Carlos Baleba leh Aurelian Tchouameni te nena huang khata dah a nih vang a ni.
Newcastle atanga Forest a zawm hnua hma a sawn chhoh dan hi City chuan an hmuh hmaih lo hle a, club pahnih inlaichinna pawh a tha hle tura ngaih a ni.
Kumin nipuiah hian City tlar laihawl an siksawi nual mai thei a, Mateo Kovacic leh Nico Gonzalez te hma lam hun a la chiang lo a, Bernardo Silva erawh chu June thlaa a contract a zawh rualin club a chhuahsan dawn tih sawi chian a ni tawh thung.
Real Madrid pawhin Rodri an ngaihven hle a; mahse, City chuan cham chhunzawm zel tur leh contract thar ziak turin an duh a, a contract neih lai hi kum 2027-ah a zo dawn.
City hian tlar hma mai bakah position dangte pawh an melh kual mek a, an player luhchilh theih tur zingah RB Leipzig winger Yan Diomande leh Bournemouth striker Eli Junior Kroupi te chu a langsar zual an ni.
Diomande hi kumin nipui bazara rawlthar hming langsar zual zinga mi a ni a, mi mit pawh a la viau a. Liverpool leh Bayern Munich bakah club lian dangte pawhin an thlithlai ngun hle.
Kroupi hi rawlthar theihna ngah leh beiseiawm tak a ni a, nikum nipui laia Bournemouth a zawm hnu atang khan a che tha thei hle a, Premier League-ah vawi 29 inlanin goal 11 a khung tawh a ni.