United States chuan Ukraine hnenah an inven nan rocket system changkang a pekna tura rawtna an pawm tih President Joe Biden-a’n a puang.
He ralthuam hi hun rei tak ata tawh Ukraine-in a lo dil tawh niin ral hla zawk atang pawha hmelma sipaite kah nana an duh a ni.
US chuan rei tak an ngenna hi a phalsak lo va, hei hi Russia ram chhung an kah a hlauh vang a ni.
Kremlin thupuangtu, Dmitry Peskov chuan US-in Ukraine hnena ralthuam a pek tur hi ‘tlang taka silai hmeh puahna tur tuialhthei a tumsakna’ a nih thu a sawi.
German sorkar pawhin Ukraine hnenah hian air defence system pek an tum bawk.
Chancellor Olaf Scholz chuan MP-te hnenah Germany-in IRIS-T system a neih chu a tun lai ber a nih thu leh Ukraine-in Russian thlawhnaten an khawpui an beihna laka veng theitu tur a nih thu a sawi.
Tracking radar an tih, hmelmate laipui leh rocket launcher awmna lai hmuh theihna an pe dawn bawk tih a sawi.
Nilaini khan hmelma kahna tur ralthuam an pek tur hmang hian Kyiv chu Russia dawr turin an dinhmun a tinghet ang a, chu chu inpalai tawna an inbiak theihna siamtu tur niin Biden-a chuan a sawi.
New York Times chanchinbu chuan, “Hei hi Ukrainian hnenah rocket system tha leh ralthuam dang pe tura thutlukna ka siam chhan a ni,” tiin a tar lang.
Biden-a’n ralthuam a pek belh hi Russia tithinur theitu a ni ve thei tho bawk a, US leh Nato-a a tanrualpuite leh Moscow inkar tikhi zualtu a ni thei.
Ralthuam tha HIMARS
Ukraine hnena US-in ralthuam a pek tur zingah hian M142 High Mobility Artillery Rocket System (HIMARS) pawh a tel tih White House thuneitu sang chuan a sawi a; mahse, engzat nge an pek dawn tih a sawi thei lo.
Ralthuam hi a ruala missile eng emaw zat kap chhuak thei niin km 70 vela hlaa mi a kap thei a, tuna Ukraine-in laipui an neihin a kah phak aia hla kap thei a ni a. Russia-in hetiang chi a neih aia a kah dik a ni.
Thla hmasa khan Ukraine army chief chuan HIMARS unit hi an mamawh tak zet thu leh Russian missile-in an beihna do let nan a nih thu a sawi.
US chuan Ukraine hnena a ralthuam pek turte hi khawchhak lama Donbas region-ah a dah rin a ni a, hei hi tuna indona a nasatna lai niin Russian laipuite leh Ukrainian khuate kaptu thil dangte pawh kap thei tur a ni.
Ukrainian President Volodomyr Zelensky chuan ralthuam hi Russia chhunga mi kah nan an hmang dawn lo tih a sawi a. “Russia-a thil thleng hi kan ngaihven lemlo va, Ukraine ram chhunga thil thleng chauh kan buaipui a ni,” a ti.
Kremlin thupuangtu, Peskov erawh chuan Zelensky-a thu sawiin hi Moscow chuan a ring lo tak zet tih a sawi a. “He thu ring ngam tur chuan Kyiv-in a intiamna a tihlawhtlin leh tlin lohvah a innghat a, pakhat mah tihhlawhtlin a la nei lo,” tiin a sawi niin Ria news agency chuan a tar lang a ni.