Mizoram chhunga vawk vulh 30,000 chuang suattu pul hri, African Swine Fever (ASF) chu state disaster-ah puan thuai a nih tur thu AH&Vety Minister Dr K Beichhua chuan a sawi.
The Zozam Times zawhna chhangin Vety minister chuan ASF chu state disaster-ah puan a nih theih nan chief minister hnenah ngenna an thlen a, tun hnaiah an ngenna chu a lo pawmsak tih a sawi a, “Official-in puan thuai a nih kan beisei,” a ti.
ASF vanga vawk suat neitute hnenah zangdawmna an pek chhuah thuai theih an beisei thu Vety minister chuan sawi bawkin, sorkar laipui atangin sum an dawng tawh a, state-in a tum ve tur planning & programme implementation department-a an dil chu pawm a ni tawh tih leh finance department lamin an release hunah an sem chhuah mai tur thu a sawi.
Minister sawi danin vawk suatte hnena zangnadawmna pek tur hi central sorkar leh state sorkarin pawisa a inzata an intum sem tur a ni a, March thla khan sorkar laipui atangin Rs 5,84,97,000 an dawng tawh a ni.
Nikum March thla atanga Mizoram leng tan, ASF vangin vawk 38,000 vel a thi tawh a, kumina ASF a len nawn hnuah March atanga June 1 thlengin vawk 3,898 a thi tawh a, vawk 3,276 suat a ni tawh bawk.