Mizoram Football Asssociation buatsaih LBS Suzuki All Mizoram Inter Village Football Tournament chu June 24 atangin an khel tan dawn a, June 14 thleng a tel tur tan entry fee pek theih a ni ang.
Mizoram pum huap football inelna lian tham tak tur hi LBS Suzuki chuan a sponsor dawn a. Team tel tur zat a zirin inkhelhna hmunhmate buatsaih a ni dawn.
He inelna hi knock out system-a khelh tur a ni dawn a, July thla chawhma lama zawh fel hman tum a ni.
MPL club-te leh DFA hnuaia club-te’n Independence Day Football leh tournament dang an khelh tura inbuatsaihna hun an neih theihna tura zawh fel an tum.
Tournament-a tel tur tan entry fee Rs 1,000 pek tur a ni a, hei hi June 14 hma ngeia pek fel tur a ni. Online (G-pay) hmanga pek tura ruahman a ni a, Organising Board Assistant Secretary Frank Rinpuia 9862647664 hnenah pek tur a ni ang a, June 14 tlai dar 3:00 hmaa pek fel tur a ni.
LBS Suzuki All Mizoram Inter Village Football Tournament dan leh hrai hi MFA Facebook Page (Mizoram Football Association) lamah download theiha dah a ni dawn a, hriat chian duh neite tan awlsam takin khawi hmun atang pawhin a hmuh theih ang.
MFA chuan he inelnaah hian Mizoram chhung district hrang hranga veng leh khaw tinte tel turin a sawm a, player zawnna hun tha a nih dawn avangin thingtlang khaw kilkhawr bera player tan pawh MPL leh ram pawn lam thlenga khelh theihna remchang inhawnna a ni tih hriain khaw tinte mahni thalaite tana hun siamsak turin a ngen.