-Lallunghnema, Charity Lodge
Consumer Right hriatna kawngah kan harh chhuak zel a. Chutiangin Consumer Awareness ka ziah karlakah hian consumer-te harsatna buaipui tur ka nei chho mek zel bawk. Consumer issue lam ngaihsak miah lo tura ka lo rin deuh te hian an harsatna min hrilh ve ta phawng phawng mai.
Ka article chhiartu in pung mek bawk a, tangkaipuitu pawh in pung zel a ni, ka lawm e. Keipawhin ka theih chen chen ka ziak ang a, ka theih loh thlengin Consumer right ka buaipui ang. He thil hi mipui hmakhua a ni, ka ti thin. Consumer-te right ngaihsaklo mi hi chu ka haw tlat nia, ka u Dochhung!
Mizoram chhim leh hmar, chhak leh thlang thlengin reader kan inzarpharh zel. Siaha lama ka nau, thuziak mi Pu Nawlchunga te, ka pu duh tak, ka thian la ni reng, Prof. Chawngkhuma te khan lo tuipui zel teh u. Kan hotupa hlun Siaha khawpuia consumer right vahvaihpuitu Pu C. Sangmanga lah a che chhuak thei meuh tawh lo an ti leh ta nghal a, a pawi hle a ni.
Tuna Siaha DC hi consumer-te humhalhna lamah a tui viau tih te ka lo hria a. Hmuh ka duhin titipui ka chak hle mai. Lawngtlai lamah Upa H. Lalnunsanga te kha an la tui zel turah ka ngai. Mi zawng zawng hi consumer kan ni vek tih hi pawm ila chuan consumerism-ah hian kan tui lo thei lovang.
Consumer chu thil leitu leh hmangtute, tihah hian lo chiang bal teh u. Nitinin bumin kan awm mek a ni si a. Kan harsatna min sutkiansak tur leh kan sal tanna ata min chhanchhuak turin sawrkar kan nei a, mi inpe te an awm hi!
Kei ve hi ka รข ta nge, ka fing ta viau tih ka hrethiamlo! Politics tui nu, sualna khurpui ka tlansanna pawh a rei ta viau mai. Kohhranah ka inhmang ve tawk tawk, YMA leh MCU-ah member ka ni mek. Chu bak eng NGO-ah mah inhmanna ka nei lo. Kan in atangin ka theih ang angin, ka thiam ang angin consumer te harsatna ka lo zir ve a. Harsatna nei ten min pan a, min phone bawk.
Hmelhriat loh, ka hmuh ngai loh lamin ka pui ve thin. Thil tha ti ka inti em em ngai lo, mahse, thil sual ti erawh ka inti lo. Ka hlim em em a, ka lawm veng veng a ni ber e. Ka thiante min fuih phurna zarah tun thlengin he hna tlawmte hi ka thawh chhunzawm zel dawn. Ka ziah chhunzawm zel ang. Lehkhabu pawh ka chhuah nual tawh bawk.
Kei rethei berh te hi Pathianin min hmangaih riau mai! Tun thlengin tarmit ka la vuah lo. Ka article te hi mit lawngin ka ziak a, ka type thin bawk. Sum tam tak aiin hriselna tha hi a lo hlu e, ka’n ti ve teh ngawt ang!
Ka lawm veng veng! Lehkhabu azawnga khal ber mai! mipui mamawh em em si, thianpa Lianzama tawngkam takin hralh a kal leh kal loh erawh thu hran ni se, chu lehkhabu bu 6-na consumer 2020 for awareness ka tih chu Pi Ramdinliani IAS ni ta mekin Supply Director a nih lai khan a office chamber-ah chhiar theih turin min pho chhuahsak a nih kha.
He nu tha leh fel hi ka lakah a tha nangiang mai! Min tanpui thin avangin lawmthu ka sawi a ni. Tunah hian bu dang a hming atan ‘Consumer-te Zalenna ‘ tih chu ka buatsaih leh tan ta chu a ni a. Eng nge ka an dawn, ka hre lo. Sum a ngai hnem hle ang. Englekhawle, ka ziak zel ang a, ka puang zel dawn, ka ti a ni. Consumer-te hmakhaw ngaiin ka bei zel mai dawn a ni. Kei ve hian Pathian rawngbawlna chi khatah ka ngai hmiah mai a ni.
Kar hmasa khan defective 2 wheeler hralh avanga hremna lek thu ka rawn ziak a. Kha case kha Consumer Protection Act 2019 Sec 2 (11) chuan Deficiency in Service a ti a. Tuntumah pawh hian Deficient Service, service tha lo, belhchiandawllo, service rintlaklo avanga consumer pakhat, raipuar tawrhna kan sawi dawn a ni.
He thil hi Medical Negligence a ni a. Medical Negligence titute hi hrem an ni bawk. Chu chu India ram chhunga thil thleng rapthlak a tling a. Media-ah a darh nasa hle a ni.
Consumer Advocacy Group-ah tarlan a ni a. He ka thu ziak atangte hian Mizorama consumer te leh service provider te hian zir tur kan nei tih hi kan hriat chhuah ka duh a ni.
Tichuan, khatia, Nagpur city-a vainu pakhat (a hming an tarlang lo) rai puar chu vawi 4 lai Ultrasound Centre-ah scanning tihsak a ni a. Mahse he vai nu naupai harsatna tak hmuh chhuahsak (diagnosed) si lovin vawi 4 zet scanning an tihsak kha awmzia a nei lo hle.
He nu natna dik tak hmuh chhuahsak ni se chuan a rang a rangin a naupai chu zai chhuahsakthuai tur a ni a.Mahse,nausen duhawm tak an beiseina chu tihtawpsak an ni tlat si! Nau chu a han nei ta ngei a, vanduaithlak takin a nau hrin chi fuke kimlo satliah mai ni lovin naute thar piangsual, piangphunga rualban lo, mihring tling lo a nih phah ta a. Vawi 4 Scanning-in awmzia a nei tlat lo!
Thil lungchhiat thlak tak an tawng ta a. He naute thar hian kut ke, zungtang a nei mumal lova. A ke ding lam khup hnuai leh ke veilam ke artui hnuai lam chu a awm lo bawk a ni.
Mihring pangngai sakruang ang pu lova nau a han hring ta mai chu an lungawilohna thawi dam nan National Consumer Disputes Redressal Commission (Imaging centre) hnenah zualko ta a. Utrasound Xeb neitu radiologist Dr. Dilip Ghike a hi an khing a ni.
NCDRC Member pahnih Justice RK Agrawal leh Dr. SM Kantikar te chuan an ngaihtuah a. An thutluknaah chuan Imaging Ultrasound Centre hi a fimkhur lo hle. He vainu vanduai tak lakah hian scanning fel leh tha tak ti se, hetiang hian vanduaina a tawk lovang, an ti a. Medical Negligence a thleng ngei a ni. He Ultrasound Centre hian Rs. 1.25 crore (nuai 125) a chawi tur a ni. Hetiang hian an pawisa chawi tur chu an pe ang : Fixed deposit in bank-ah pawisa hi an dah ang. Naute hmingin, a puitlin thlengin pawisa an dah tur a ni. A nu leh pa ten a pung hi an la chhuak thin ang. Chu pawisa chu an naute enkawl nana hman thin tur a ni. Hei bakah hian Radiologist leh a clinic chuan cheng nuai khat chu Consumer Commission a thubuai buaipuina a senso phuhrukna atan complainant te hi an pe ang.
He National Consumer Comnission Landmark Judgement hi hmun dang, State danga thil thleng a ni a. Mizoram-ah hian damlote enkawlna hmun leh check-up -na hmun kan nei ta nual a, complaint pawh a awm nual. Doctor leh damdawi lama thawkte laka lungawilohna te pawh kan hre thin. Chuvangin keini consumer-te hian kan lungawilohna te kan lawm lohna te hi kan au chhuahpui ngam ve tur a ni,tiin infuih nan ka han tarlang a ni.