FIFA chuan 2026 World Cup-ah squad-a player 26 awmte chu ram hla sak laiin khelmualah an ding vek tawh dawn tih an puang.
A hma chuan World Cup-ah hian inkhelh hmaa ram hla an sak laiin khelmualah bul tantu tur player 11 chauh an ding thin a, substitute-te erawh manager leh coaching staff-te nen khelmual sirah an lo ding mai thin a ni.
United States, Canada leh Mexico rama khelh tur, June 11-a Estadio Azteca-a tan tur FIFA World Cup-ah hian an tih dan phung chu thlak danglam a ni dawn ta a. Player-te chu entu thutna hawi tawh loin, centre circle bial hualin an ding tawh dawn a. Inkhel bul tan lo player 15-te pawh centre circle sir tawn ve veah an lo awm ve tawh dawn a ni.
FIFA President Gianni Infantino chuan thuchhuah siamin, “FIFA World Cup a lo lian zel a, inkhel hmuhnawm kan thlir dan kawngah pawh hmasawnna thar kan siam zel a ni. Ram hla sak laiin player leh referee zawng zawngte centre circle-ah inhmachhawna an din hian inpumkhatna, inpawhna leh tih tak takna thinlung an put phah dawn a, team-te leh mi tin ta liau liau a ni tih hriatna tha tak a ni dawn a ni,” a ti.
“FIFA World Cup hi player tin leh fan tinte puala siam a ni a, inkhelh hmaa he hun serh thar kan hman tur hian chu chu a lantir a ni,” a ti bawk.
Kumin World Cup-a thil thar awm chhun a ni dawn lo va, FIFA chuan World Cup final-ah Super Bowl ang chi half-time show hmuhnawm tak an buatsaih dawn tih an puang tawh a, chutah chuan Madonna leh Shakira te pawh an inlan dawn a ni.
World Cup lian ber turah hian team 48 an tel dawn a, inkhel 104 a awm dawn a. A thlengtu ram pathumah hian hawnna hun serh hrang hrang vawi thum hmuh tur a awm bawk dawn a ni.
June 11-a Mexico leh South Africa an inhmachhawn hmain, kum 2010 World Cup hawnna inkhelh nawn lehna turah hian Shakira leh Burna Boy te an inlan dawn a. June 12-a Canada-in Bosnia & Herzegovina an hmachhawn turah Toronto khawpuiah Michael Buble leh Alanis Morissette ten hma an hruai dawn a. Chumi ni tlai lama US-in Paraguay an hmachhawn turah Los Angeles khawpuiah Katy Perry leh Future te an inlan ve thung dawn bawk a ni.
Khelmual chhungah pawh danglamna lian tak a awm dawn bawk a, VAR chuan corner leh yellow card vawi hnihna te a enfiah tawh dawn a. Chutih rualin goal kick leh throw in-ah te hun bituk a awm dawn bakah first half leh second half chhungin minute thum chhung tui in chawlh a awm tawh dawn bawk a ni.