Maharashtra-ah hian speaker tur thlan fel a nih hnuah Thawhtanni hian Shinde-a kaihhruai sorkar chu speaker thar, Narwekar-a kaihhruaina hnuaiah buk a ni dawn a. Thlirna leh kil hrang hrang atanga tehin Sena atanga hela chief minister ni zui ta hian bukna a paltlang ngei a rinawm hle.
Sena atanga hela state pawna an chhuah lai khan Thackeray-a kaihhruai Sena chuan Supreme Court-ah Shinde-a lamtang MLA 16 chu an nihna hnawl turin an lo ti tawh a. Court hian a lo pawm a nih chuan sorkarna chang tura thlawptu neih ngai zat chu MLA 137 a ni dawn a. Vote 16 pawh hian lo kiam ta se Shinde-Fadnavis sorkar hian vote 148 an la neih hmel a, an tling thei tho.
Shinde-a hova Sena atanga hel MLA 39 zawng pawh paih ni se rorelna fawng a chelh zui hmel tho va. MLA 39 hnawl an nih chuan sorkarna chang turin MLA 125 thlawpna neih a ngai dawn tihna a ni ta a, Narwekar-a vote-tu kha MLA 164 an nih avangin 39 pawh paih ila Shinde-a sorkar hi a tling zo tho dawn a ni.
Chhutna chi hniha chhut pawhin Thackeray-a kaihhruai zawk Sena chuan hnehna an chan theih hmel loh va, hei hi chief minister atanga a bân chhan, rorelna inah a sorkarin rin a hlawh tih fiahna a paltlang zawh dawn loh vang a ni.
Speaker thlannaa hai, Samajwadi Party leh AIMIM MLA pathumten Thackeray-a lam lo tang pawh ni se hnehna chanpui tham a ni chuang lo.