United States-a Kentucky state-ah in chhunga buaina siam nia puh pa pakhat man tuma thawk chhuah police pathum kah hlum an ni.
Police chuan kum 49 mi, kap hlumtu nia puh hi an man nghal bawk a, an kawl mek.
Floyd County Sheriff John Hunt chuan officer-te hian he pa in hi an thlen chuan ‘hremhmun dik tak’ an va tawng ta mai niin a sawi.
Kentucky khawchhak lam tlangdunga khaw tereuh tê, mi 166 chauh chenna, Allen khuaa silai hmeh puahna thlengah hian mi dang paliin hliam an tuar bawk.
Ningani zana thil thlenga thi officer-te hi Capt Ralph Frasure, Deputy William Petry leh ui fing kaitu (dog handler) Jacob Chaffins an ni.
Chaffins-a’n ui a kaih zinga pakhat, K9 Drago tia a hming an vuah chu a thi bawk.
Capt Frasure-a hi Prestonsburg, Kentucky, Police Department hnuaia kum 39 zet lo thawk tawh niin a thih ni thlengin zahawm leh ropui takin a thawk niin department chuan an sawi.
An ram sanaa zan dar 7:00 (India-a Zirtawpni zing dar 5:30) rik hma deuhva Main Street-a silai hmet puaktu nia puh in an thlen hian rifle-a a lo kah avangin an tlanchhe hlawm.
Darkar thum dawn silai a rik hnuah a kaptu bera puh, Lance Storz-a hi man a ni ta a, a chhungte zinga mite nena indawrna neih a nih hnuah a inpe a ni.
Police officer thah thubuai pahnih, police officer thah tumna panga, mi thah tumna pakhat leh sorkar ran vulh thah thubuai siamsak a ni.
“Kan khawtlanga hun hrehawm tak a ni,” tiin Kentucky Governor Andy Beshear chuan social media-ah a tar lang a. “Floyd County leh a hmachhawntu sipai huaisente chu nizan khan kan chân a ni,” a ti.
Kentucky State Police trooper-te chuan inkahna thleng hi an chhui mek a ni.