Nigeria-a police chuan naupang eng emaw zat telin, mi 77 zet chu an ram chhimthlang lam, Ondo state-a biak in pakhata an tawmna atangin an chhanchhuak.
An zinga thenkhat chu thla eng emaw zat he hmuna lo tawm tawh an ni.
Police thupuangtu chuan April thla khan Isua Krista a lo kal leh dawn nia an ngaih avangin sikulte pawh kharin he hmunah hian an lo nghak a ni.
Nu pakhatin police hnenah a fate an chin a hriat loh thu leh biak inah hian an tawm ngei nia a hriat thu a thlen atangin an dap ta a ni.
Police hian Ondo Town-a Valentino vengah, Whole Bible Believers Church-a thil thleng hi a huhova mi ruk bona a ni thei em tih an chhui zui nghal mek.
Pentecostal kohhrana an pastor, David Anifowoshe leh a thachhangdawltu chu man an ni tawh a, lo tawm khawmte hi tunah chuan thuneitute hnuaiah an awm tawh.
“Tuna chhui tawh chinah chuan Pastor Josiah Peter Asumosa, he kohhrana assistant pastor hian April thlaah mi thianghlim lawr a awm dawn niin a sawi a; mahse, a hnuah September, 2022-ah sawn lehin thalai leh nu leh pa tam tak chu Pathian thu awih turin a ti a ni,” tiin police press officer Funmilayo Odunlami chuan a sawi.
Police hian naupang 26, tleirawl pariat leh puitling 43 an chhanchhuak niin a sawi bawk.
Isua lo kal lehna hi Kristianten Bible-a inziak anga an rin dan a ni a. Mi thianghlim lawr ve thung hi Kristianten Isua lo kal leh huna a thu awihtute a lawr tura an rinna a ni.
Ondo state-ah hian nasa taka biak in beihna a thlen thin avangin Kristiante hi an chiaiin an hlauthawng hma hle a ni.
June 6 khan Owo khuaa St Francis Catholic Biak In chu bomb leh silai hmanga nasa taka beih niin mi 50 vel zet an thi a ni.
Beihna hi Islamic State West Africa Province tih niin an ring.