Aizawl : Zalenna a sual laia sipaiin an man, dam chhung lung in tang tura a chungthu rel B Vanlalzari lehkhabu ziah ‘Zari Jail Daity’ tih chu Inrinni khan Chief Minister Zoramthanga’n a tlangzarh.
Synod Conference Centre-ah lehkhabu tlangzarh inkhawmah thu sawiin Chief Minister, MNF president Zoramthanga chuan, "Pi Zari tawrhna thlentu IGP kahhlum avang khan remna a awm theihna atana inbiakna a kal chak phah hle a. Mi tam tak thihna, nunna an hlanna, fahrah leh hmeithaia tam tak an awm phahna, zalenna sualnain a hrin chhuah remna ropui zia hi kan chhut thin tur a ni. Hetianga inremna tha leh hlawhtling hi Asia hmun dangah awm kan hre lo," a ti.
Lehkhabu ziaktu B Vanlalzari'n thubuai a neih lai leh jail a tan lai, khatih laia MSU Shillong President ni a, tuna Health Minister ni mek Dr R Lalthangliana pawhin thu sawiin, zirlai pawlin theihtawp chhuaha B Vanlalzari jail tang la chhuak tura tha an thawh thu te a sawi a ni.
B Vanlalzari pawhin thusawiin, Jail-a a tan chhung zawnga Pathianin a hruaina chu lawmawm a tih thu a sawi a. "Tu emaw party tana tuar ka ni lo, Mizo hnam tan ka tuar a ni, tih hi ka pawm dan a ni a, Mizo hnam tan tih hi ka nunpui ber a ni. Kan hnam tana tuar theia ka awm hi Pathian hnenah lawmthu ka sawi a ni," a ti.
'Zari Jail Diary' tlangzarhna inkhawm hi Prof. Rualkhuna Colney-in a kaihruai a, Lalhruaitluanga Chawngte-in lehkhabu thlirlawkna hun a hmang a ni.