Aizawl: Mizoram sorkar leh Telecommunications Consultants India (TCIL) chuan Aizawl Vaivakawn leh Bawngkawn-a flyover siam turin nimin khan thawhhona thuthlung (Memorandum of Understanding) an ziak.
CM Conference Hall-a hun hmanah sorkar aiawhin K. Lalthawmmawia, Secretary, PWD leh TCIL aiawhin Rashk Siddiqui, Asst. General Manager ten an ziak a ni.
Thawhhona thuthlung ziah chungchang sawi fiahin Er Bowman, Engineer-in-Chief, MPWD chuan TCIL-in Vaivakawn leh Bawngkawna flyover siamna tur DPR (detailed project report) siam atangin sorkar laipuia bawhzui bakah, hna thawktu tur pawh an zawng vek dawn tih a sawi a. Mizoram sorkarin sum sen tur a nei ve dawn lo tih sawiin, TCIL hlawh tur pawh DPR atangin zaa 4 an insiam sa thu leh, sorkar laipuiin he project atan sum lo sanction thei lo palh pawh nise Mizoram sorkarin chawi engmah a neih loh tur thu a sawi.
Advisor to CM (Technical) Er. K. Lalsawmvela (Rtd.) pawhin flyover siamna tur hi engkim zirchianna neih a nih tawh thu a sawi a. TCIL kutah engkim dah ni mah se, Mizoram sorkarin thu delhkilh tha tak siamin hnathawh danah TCIL-in an duh dan ang anga kalpui theih a nih dawn loh thu leh Mizoram sorkarin a vil zui dawn tih a sawi.
Er. K Lalsawmvela hian flyover pahnih bakah Chaltlanga Transport workshop hmunah Bus Ternimal thar siam tura ruahmanna a awm mek thu leh TCIL in engkim an buaipui vek dawn tih a sawi bawk.
Chief Minister Zoramthanga hriatpuinaa inremna thuthlung ziahah hian sorkar mi pawimawh dangte pawh an tel a ni.