Aizawl: March thla tawp atangin Mizoramah Covid-19 leng a ziaawm tan a, ni 65 zet chu ni khata hri kai hmuh chhuah pawh mi 100 hnuai lam zel a ni a. Tun hnaia hri kai an pung leh tan thung a; Thawhtannia hri kai chhuah chu 100 chuang a ni leh ta a; sorkar pawhin mipuite chu fimkhur thar turin an ngen.
Thawhtanni khan sample 595 endikah hri kai 138 hmuh chhuah a ni a, hri kai hmuh 137 chu Rapid Antigen Test atanga hmuh a ni a, pakhat chu ZMC RT-PCR atanga hmuh chhuah a ni.
June thla kalta chhung khan Covid-19 kai mi 775 an awm a, tun thla thar ni li chhungin hri kai thar 242 an tling tawh a. Covid-19 kaihhnawih a thi hi June thla pum khan mi panga an awm a, July thla ni nga chhung hian mi pathum an awm hman tawh a ni.
Nimin tlai dar 5 thlenga Mizoram District hrang hranga hri kai awm zat chu: Aizawl district-ah 193 an awm a, Lungleiah 53, Kolasib-ah 8, Serchhipah 42, Mamitah 20, Khawzawl leh Hnahthialah mi pakhat ve ve leh Saitualah 20 an awm a; Lawngtlai, Siaha leh Champhaiah hri kai enkawl lai an awm lo.
Hetianga hri kai an pun leh takah hian Covid-19 chungchanga sorkar thupuangtu, Dr Pachuau Lalmalsawma chuan hri laka fimkhurna kawnga tan la thar tur leh infuih thar turin Zoram mipuite a ngen.
Dr Pachuau Lalmalsawma chuan tun dinhmuna hri kai mi 338 awm mekte zingah nunna chân awm lo mah se heng zinga thenkhat hi in lama na tak tak leh damdawi ina awm mekte an nih thu sawiin, symptom lan chhuah hnu pawha an nat viau hma chu in-test lo, an in-test hnua lo tlai tawh si tun hnaia nunna chân zingah pawh an awm tih a sawi.
Thalai kum naupang tak, natna dang engmah nei lo pawhin a thihpui tih a sawi a, natna lan chhuah tan tirh emaw, inrinhlelh veleh emawa in-test ngei ngei turin mipuite a ngen a ni.