AIZAWL: Mizoram sorkar hnuaia hnathawk pawl inzawmkhawmna Federation of Mizoram government employees & workers (FMGE&W) chu nimin khan an president Lalchuailova hovin an thukhawm a. Mizoramah a vawikhatna atana ‘Federation Enclave’ din tur chungchang an sawiho.
Sorkar thuchhuahin a tarlan danin, Mizorama World class housing complex lian tak sa tur hian Blue Mountain Construction Engineering & Services Pvt. Ltd. te chu Builder & Developer atan thlan niin, he project hi an khawih ang a. A complex hmingah 'Federation Enclave' tih vuahin Mizoram sorkar hna- thawkte puala he complex hi din tur a ni.
India leh North East huamchhunga Housing complex changkang ber tura ruahman hi Chief Minister Zoramthang a'n tun thla ni 15 ah Govt. Complex, Luangmual, Aizawl-ah a tlangzarh (launch) dawn a. Hemi rual hian he Complex-a Flat/apartment lei duhte tan booking hawn nghal tura ruahman a ni bawk.
Federation Enclave-ah hian Flat/apartment 344 awm tura ruahman a ni a, Building block hrang hrang-ah 2 bed room, 3 bed room and 4 bed room type te thlan theih tura ruahman a ni. Flat/apartment-te hi luah hawh tur ni lovin a leia lei tur a ni dawn a. A leitute chu permanent owner an ni nghal dawn a ni.
Sorkar thuchhuahin a tarlan danin, he complex hi lirnghing laka a him theihna turin Japanese technique of Rocco housing hman a ni dawn a. A design-tu architect pawh khawvel huapa lar leh hmingthang Prof. Christopher Charles Benninger leh a hote an ni.
Building block tinah elevator/lift chak chi awm vek tura ruahman a ni a, Fire safety network, 24 hours electric power backup, water recycling plant, Car parking, Club house, intihhlimna chi hrang hrangte leh thil dang dang ken tel tura duan niin, he complex thar tur hi a changkang thei ang bera duan ni mahse, man tlawm taka lei theih tura duan a ni a. 10% payment pe-a book theih a ni ang a, Bank hrang hrangin home/ho- using loan hmangin a leitute an pui dawn niin sorkar thuchhuah chuan a tarlang bawk a ni.