Maroon 5 chuan 2022 world tour poster an tlangzarhah Japanase ‘Rising Sun Flag’ an hmang a, nasa taka sawisel an tawh hnu-ah siam tha lehin, band member thlalakin an thlak.
A bik takin, South Korea atanga sawiselna an dawn zozai chu en liam hleih theih pawh a ni lova, poster mai ni lo official website-ah an chhawpchhuah te pawh an thlak danglam nghal vek.
Korea rama show organiser te chuan Maroon 5 member te leh an hotute sawipuiiin, Korean fans te ngaimawh thil leh an rilru natna chawktho thei a nih vanga ngaihtuah tha leh turin an ngen a ni.
Korean te tan chuan Ni chhuak lai tarlanna flag hi tunhmaa Japanase Imperial Army te’n an lo hman thin, sipai chakna hmanga rawng tak an chetna hriatchhuah tir thei a ni tlat a.
Indopui pahnihna hmalam atang tawha Japana hote’n Korean ho laka nunrawnna rapthlak tak tak an lo hlenchhuahna te kha an theihnghilh thei lova, khang hun lai zawng khan ‘Rising Sun Flag’ hi an hmang rim.
Maroon 5 hian world tour an neih kal zelah November 30 hian Seoul khawpuia Gocheok Sky Dome-ah zan khat concert an nei ang. February 2019 hnu lama band anga he rama an chet leh hmasak berna tur a ni bawk ang.