Germany khawthlang lama nasa taka tui lian vangin mi 33 vel an thi a, mi dang eng emaw zat an chin hriat a la ni lo bawk tih police-ten an sawi.
Rhineland-Palatinate leh North Rhine-Westphalia state hniha tui lian hi an rama a la nasat ber tum a ni a. In lian tak tak leh lirthei eng emaw zat a len.
An ram thenawm, Belgium-ah pawh mi pali thi an awm a, Netherlands pawhin an tuar na hle bawk.
Europe khawthlang lamah hian tun hnaiah ruah tam tak a sur a, hei hian lui tilianin a kuang an luang liam nasa hle.
Rhineland-Palatinate state chief Malu Dreyer chuan an chhiatna tawh chu a rapthlak tak zet tih a sawi.
“Thi an awm a, tam tak an chin kan hre lo va, dinhmun derthawng tak taka awm pawh an awm,” a ti a. “Kan emergency services-te chu chhun zan zawmin, an nunna atan pawha hlauhawma an thawk reng a ni,” a ti bawk.
United States-a President Joe Biden nena inbe tura thang mek, Chancellor Angela Merkel-i pawhin an rama chhiatna thleng chanchin chuan a barakhaih tak zet tih a sawi.
Rhineland-Palatinate state-ah hian Ahrweiler district-ah chuan mi 19 an thi tih chian a ni tawh a. He hmunah hian Rhine luipuia luang lut Ahr chu nasa taka a kuang luang liamin a lian a ni.
Police helicopter leh sipai za chuangin an chenna ina tangte chhanchhuah hna an thawk mek zel a. Police chuan mi eng emaw zat an in chungah lawnin chhan chhuah hun nghak an awm tih an sawi.
Sikul thenkhat chu chawlhtir an ni a. Rel leh lirtheia inkalpawhna vel pawh a buai phah hle bawk.
Tlangram, Eifel region-a Schuld bei Adenau district-ah chuan chenna in 25 chuang chu chim mai thei dinhmunah a ding mek a. Emergency puan a ni tawh tih German broadcaster SWR chuan a puang.
In thenkhat chu kalpawh ngaihna a awm lo va, lawngleng hmang bakin a kal theih loh.
North Rhine-Westphalia-a Euskirchen-ah mi pariat an thi tih sawi a ni a. Eifel region-ah an chenna in tuiin a lak avangin mi pali an thi bawk.
Hetih lai hian North Rhine-Westphalia-ah tho hian Nilaini khan kangthelhtu mi pahnih an thi a. Pakhat chu tuiah tlain pakhat pawh hi mi chhan a tumna lamah tuiin a la nia sawi a ni.
Sik leh sa lama mi thiamte chuan sik leh sa inthlak nasa lutuk chuan hetiang khaw awm dan uchuak tak tak hi a thlen phah nasat a rinawm thu an sawi.
North Rhine-Westphalia preimer Armin Laschet chuan tui lian tuar na zualte a tlawhnaah khawvel pum lum zel chu a chhan berah a puh a. “Hetiang hi kan la tawng zel ang, kan sik leh sa hi kan hum a ngai a, sik leh sa inthlak hi hmun khat bikah chauh a ni si lo,” a ti.