Meghalaya-a East Garo Hills Police chuan Rengdim-a mi ruk bonaa a mawhphurtu bera ngaih, Bronson Momin chu an man.
Momin hi July thlaa Rengdim atanga Rintu Marak ruk bonaa mawhphurtu bera ngaih a ni a. Police-in an chhui zuinaah Rongjeng-ah man tepin a tlanchhuak hman hlauh a ni.
A tuihhruai gang member dangte chu Rongjeng leh Rongmil-ah man an lo ni tawh hlawm a. Momin-a hi Gabil Koksi ram hnuai pik takah a biru a, ralthuam tha tak tak pawh neiin a pawl hi tihlen zela East Garo Hills, North Garo Hills, West Khasi Hills leh South Garo Hills lamah pawh inzar pharh zel a tum nia hriat a ni.
Thawhlehni khan police-te hian thu dawngin Gabil Koksi huam chhungah hian a hnuhma an hmuh thu an hria a. Nimin khan khawvr hma atangin beihpui thlakin an thawk chhuak nghal a. Superintendent of Police, East Garo Hills kaihhruaiin Special Force commando 10 chuan Rongmil Operation Group Centre huam chhunga Nengtek Gabil Koksi ram hnuaia an tawmna chu an hai chhuak ta a ni.
Momin-a kut atang hian AK 47 (Dummy), SBBL shot gun, Air pistol, kukri (knife) leh mini solar panel an man tel.
Rongjeng Police Station-ah lak nghal niin West khaki Hills District police kutah an chhui zui turin an hlan.