Zu khapna dan hnuaiah dan ang taka grape wine hralh theihna tur wine rules la awm lo mah se Champhai leh Hnahlan Grape Winery-in grape rah an lei mek.
Champhai Grape Grower Society (CGGS)-in July 13, 2022 khan grape chingtu chhungkaw 29 hnen atangin a rah kg 6757.65 an lei a, Rs 4,05,458 man a ni.
The Zozam Times zawhna chhangin CGGS hruaitute chuan tuna an lei bak chu hi August thlaah an lei chhunzawm leh dawn tih an sawi a, August thla hi grape rah thar chhuah tam vang lai a ni tih an sawi.
Hnahlan Grape Growers’ Society (HGGS) pawhin an lei mek bawk a, July 16 thleng khan quintal 827.26 an lei tawh.
HGGS hruaitute chuan grape hi kg khat Rs 60-in an lei tih an sawi a, “Grape kan leina sum hi pek nghal vek an ni a, ba a awm lo,” a ti.
Grape rah hi kum hmasa lamah chuan kg khat Rs. 50-in an lei a, kuminah erawh Rs. 60-in an lei a ni.
May 27, 2022-a Excise Force-ten Millennium Centre-a grape wine thahnem tak an man hnu khan wine chungchangah inhnialna nasa tak chhuakin sorkar pawhin beih a tawh phah nasa hle.
Hetiang thil a thlen hma hian Champhai leh Hnahlan Grape Grower Society hian wine rules siam turin sorkar an lo ngen tawh thin a, tun hnaiah pawh ngen thar lehin political party-te pawhin wine rules mumal tak siam a tul thu an lo puang tawh thin bawk.
The Zozam Times thudawnin sorkarin wine rules hi a buaipui mek a, Law & Judicial department-in vetting an ti zo tawh a, cabinet meeting-ah pawh ngaihtuah thuai a nih beisei a ni.
Champhai leh Hnahlan Grape Grower Society hruaitute hian wine rules siam tura sorkar an ngenna hi a hlawhtlin ngei an beisei hle tih The Zozam Times an hrilh.