Aizawl: Congress Thalai President Dr Lalmalsawma Nghaka chuan Tawngtai Bethel Camping Centre (TBCC)-in êng chhit man an pek theih loh avanga kawlphetha tihtawpsak an ni chu sorkarin ngaihhnathiamna nen pe leh turin a ngensak.
Inrinni khan MPYCC chuan an president hoin Sakawrtuichhuna TBCC an tlawh a. Centre dintu, Zohmingthanga hian kum 14 lai Chawnpuia an awm hnuah kum 2019 khan Sakawrtuichhunah an insawnin hemi kum hian kawlphetha pawt lutuin Phase III an mamawh nia inngaiin an pawt a; mahse, êng chhit man chu Chawnpuia an chawi ang, thla khata Rs 2,000-3,000 chawi tur emaw an intih laiin bill a san tak avangin phase hrangin an tihtir leh a, hemi hnuah pawh bill a ngai reng a. Thla hmasa atang khan êng chhit man Rs. nuai 5 dawn lai an pek theih loh avangin disconnect tura hriattir an nih thu leh a zatve tal chhung lut turin tih an nih angin an neih ang ang Rs. 25,000 an chhung tih a sawi a. Mahse, July 16, 2022 khan TBCC electric connection chu tihtawpsak an lo ni ta tih a lo hrilh a ni.
Dr Lalmalsawma Nghaka hian kawlphetha awm loh avangin khaw lum karah tuna mi 700 dawn lai awm mekte hian harsatna nasa tak an tawk dawn tih a sawi a. Sorkarin kawlphetha chhit man an pek theih loh chu ngaihdamna sang ber nena connection pe leh nghal tur te, ngaihnathiamna pe tur leh mi thilphalte pawhin ngaihven rang tura a ngenpui thu a sawi.
MPYCC president hian eng chhit man sang zel chu ngaihtuah nawn a ngai tawh hle tih sawiin, “Electric hman man sang ta vak hi ni tin eichawp zawng mi harsa zawkte leh Mizorama chhungkaw tam zawkte tan phurrit a ni ta a, kan sorkar hian a tihsan thur thur hi bengsika a ennawn leh a pawimawh hle. Electric bill sang hi buaina tham a tling ta,” a ti.
Congress Thalai president hian TBCC hi Rs 10,000-in a tanpui nghal a ni.