Aizawl : Riverine Reserved Forest huamchhunga rin luh an nih duh lohna lantir leh, an chenna hmun huamtir ve lo tura thuneitute kar nan, inrinni khan, RRF pian hma daih kum 1871-a din tawh nia inchhál Tlabung khuaah, Joint Action Committee huaihawtin mipui thahnem takin kawng an zawh.
Tlabung JAC chairman P Vanlalmawia chuan, RRF huamchhungah, kum 151-a upa an khua rin luh a nihna sûttir tura thuneitute an lo dâwr tawhnain awmzia a neih thui loh vanga, kawng zawh rawt ta an nih thu, a sawi a, thil tum ṭha tak neia duan a nih vangin RRF ngawr ngawr chu thlawp mah se, kum 1965-a hemi a pian hma daih, kum 1871 atang tawha thlamuang taka an lo chen tawhna rin luh a ni lehzel chu hriathiam chi-a an ngaih loh thu sawiin, tunah pawh chhungkaw tam takin harsatna an tawh phah mek thu an sawi.
Chawhma dar 11-a kawng zawh tura thawk chhuak mipuite chu Tlabung Bazar Bungkawnah pungkhawm hmasa phawtin, JAC chairman P Vanlalmawia, vice chairman Lalhmingthangi leh YMA : Tlabung branch Finance Secretary C Lalrintluanga-ten thu an sawi a, mipuite hian Tlabung chu RRF pian hma daiha awm tawh a nih thu te, thlamuang taka an chenna RRF hmanga hung hnan a ni chu an hriatthiam loh thu te, an dikna leh chanvo humhalh tura a tawp thlenga kal zel an tum thu te, hmangin an au rual a ni.
Tlabung JAC hruaitute chuan, tun hma zawngin RRF chu sawi rik a nih ngaih loh avang leh, Tlabung leh Kawrpuichhuah inkalpawhna kawng laih a nih pawha ram neituten an ram hlutna an tel avang te, leiman pe-a Sorkar-ah chhiah an chhûn luh reng tho avang tein, an chenna hmun bik chu huamtir a ni ve loah an ngaih tih an sawi a; nimahsela, NH 302 sial zauh hna thawh mekah RRF chungchang chu a rik chhuah tak avang leh, mi tam takin an ram hlutna an tel theih dawn tak loh avangin, Tlabunga chhungkaw tam zawk chenna chu Riverine Reserved Forest huamchhunga rinluh fel ni taa an ngaih thu an sawi.
Tlabung JAC hruaitute chuan, kawng zawhtute hi an zavaiin mi 2200 bawr vel an tling niin an sawi.