Vietnam chuan tun laia vawk pul hri hlauhawm tak, African Swine Fever laka invenna, vaccine chu United States nen an siam chhuak a, ram pawna thawn chhuah theih thuai an inbeisei tih thuneitu pakhatin a sawi.
He hri hi mihring hlauhawm ni lo mah se kum 2019-a Vietnam-a hmuh chhuah a nih hnuah Asia khawmualpui hmun hrang hrangah darhin ran maktaduai tel suat a nih phah.
Vawk sa pawh nasa taka to phahin khawvela sa inpek kual vel pawhin nasa takin a tawrh phah a. Vietnam hi Asia chhimchhakah chuan a tuar na ber zinga mi a ni.
“A siam chhuah leh hralh theih tura tihfel (register) hi chhinchhiahtlak a ni,” tiin Agriculture & Rural Development Deputy Minister Phung Duc Tien chuan kar kal ta Nilaini khan a sawi.
“Kan ram chhunga hman tur swine fever vaccine siam chhuah leh ram pawna thawn chhuah theih ngei kan inring nghet tlat,” a ti.
Hetih lai hian thuneitute chuan vaccine pek chhuah hun tur emaw, an siam chhuah theih zat tur emaw engmah an la sawi thei lo.
Kum 2020 atang khan Vietnamese researcher-te leh US scientist-te chu NAVET-ASFVAC inchiuna zir chianga invena atana hman theiha siam turin an thawkho tan tih Tien-a chuan a sawi.
US Department of Agriculture hnuaia Agricultural Research Institute chuan Department of Animal Health of Vietnam hnenah NAVET-ASFVAC vaccine chu a himin hna a thawk tha tih lehkhaa an hrilh thu a sawi.
“Vaccine dam hun chhung (hna a thawh chhung) hi thla ruk a ni,” tiin Tien chuan a sawi.
Vietnamese clinical lab pangain an enchhinnaah chuan he invenna la vawi zawng zawngte chu a veng tih an hmu tih a sawi.
Department of Animal Health chuan Zirtawpni khan he invenna hi Vietnam-a hman tura hawnna tur hriattirna a chhuah bawk.