Ram chhung hmun dang rualin Mizoramah pawh India president 15-na tur thlangin Mizoram Legislative Assembly-a member 40-ten nimin vote an thlak a, MLA tam zawk, zaa 72-in NDA candidate Droupati Murmu-i vote an pe.
President thlanna hi chu Mizoram State Legislative Assembly House-a committee room-ah chawhma dar 10 atanga tlai dar 5 inkar neih a ni a, Aizawl South II MLA Lalchhuanthanga’n chawhma dar 10:15-ah vote thlakin a hmasa ber a ni. Chawhnu dar 1:05-a vote thlak, Lunglei South MLA Dr. K.Pachhunga chu a hnuhnung ber a ni a; MLA 40-ten vote an thlak vek a ni.
Mizorama rorel lai, MNF Legislature party (MLP) leader, Chief Minister Zoramthanga’n NDA candidate hnena a lo sawi lawk tawh angin MNF MLA 28-ten Murmu-i an thlang niin MLP hotuten The Zozam Times an hrilh a. BJP MLA pakhatin NDA thlawp hi a thlang bawk.
Congress Legislature Party member pangain eptu pawl hrang hrangcandidate intawm, Trinamool Congress hruaitu, Yashwant Sinha an vote tih party hruaituten The Zozam Times an hrilh a. ZPM Legislature party member parukin Sinha hi an vote tih ZLP Secretary Dr. Vanlalthlana’n a sawi bawk.
President thlannaa vote thlaktute hi ram pumah mipui thlan MLA 4,033 bakah Lok Sabha MP 543 leh Rajya Sabha MP 233, an vaiin mi 4,809 an ni.
Vote thlaktute hi mipui zat atanga tehin an vote hlut zawng hi teh vek a ni a, Mizoram MLA-te vote hlut zawng tur chu pariat theuh a ni a, MP-te erawh ram pumah a inang khat a, pakhat vote hlut zawng chu 700 a ni.
Vote tlate hi July 21-ah Parliament House, New Delhi-ah chhiar a ni dawn a, Mizorama MLA-te vote hi he inthlana Mizoram tana Assistant Returning Officer leh Presiding Officer hna chelh kawp, H. Lalrinawma leh officer pakhatin vawiinah Delhi an panpui dawn a ni.