Aizawl : Sorkar laipuiin ram chhunga Hotel leh Restaurant ten anmahni dawrtute hnen atanga chaw (ei leh in) man baka service charge dil belh emaw phut belh a khap a. “Hming dang emaw midang hming pawhin service charge hi an la tur a ni lova, food bill-a service charge ziahkai belha, bill total atanga GST lak pawh khap tlat a ni” a ti.
Sorkar thuchhuahin a tarlan danin, service charge chu a leitu/dawrtuin a pe duh a niha, a phal (voluntary) a nih chauhvin an dawnsak thei tih Hotel leh Restaurant neitu ten an hrilhfiah ngei tur a ni.
Hotel leh Restaurant service charge thua thil leitu (consumer) lungawilote chuan an awmna district bawrhsapah complaints an thehluh theih thu sorkar thuchhuah chuan a tarlang a. District collector ten Central Consumer Protection Authority (CCPA)-ah a tul angin an thlen leh thin tur a nih thu a tarlang bawk.
CCPA chuan tun thla ni 4 atanga hman tan turin consumer protection act, 2019 section 18(2) (1) kaihhruaina (guidelines) a tichhuak a ni.