Juventus in Bayern dilna pawm, De Ligt thlaktu tur an dap nghal

Italian club Juventus chuan an defender Matthijs de Ligt  chu hralh an hnaih a, hei vang hian a thlaktu tur an dap nghal.


Bianconeri leh German champion Bayern Munich te hian tunhnaiah ngawrh takin inbiakna an nei a, Pathianni khan Euro maktaduai 80 vel bawrin Bayern Munich hian dawrna an thehluh chu Italian club lamin an lo pawm nghal.


Bayern hian Euro maktaduai 70 an pe phawt anga, a bak zawng la pek belh tur an ni ang. Juve lam beisei aiin tlem deuh mahse Italian club lamin an pawm thova. Player insawnna hi tihfel thuai an duh tlang a, Thawhtanni khan De Ligt-a agent Rafaela Pimenta chu Turin khawpuiah engkim tifel turin a awm tawh.


De Ligt hi Juventus in an tlarhnung innghahna thar a nih theih beisei in Ajax atangin an lalut a, mahse season thum an hnena a hman hnuah beisei angin a khel lo.


Hei vang hian Juve in hralh an ui lem lova, a hmunruak erawh hnawhkhah ngai dawnin Europe defender tha an ngaihven hlawm mek.


Villarreal star Pau Torres hming a ri ring ber a, Fiorentina atang Nikoma Milenkovic bakah Arsenal defender Gabriel Magalhaes leh an hmelma Torino defender Gleison Bremer te sawi tel an ni bawk