A hringnun lamtluang a mam hran lova, vanduainain a umzui thin. Pasal fel tak a nei a, fan te’n an thlawp ṭha bawk a, ‘A mal bik lo’ tih hriatna an neih tir chu a beisei phâk piahlam niin, lawmna tur hlir niin, Ariana Grande-i’n a sawi.
Kum 28-na hmang mek zinkawng hi a bum bohin, rilruhahna tur a ngah fal thin hle a, vanduai bik ngawih ngawiha inhriatna nei fo ṭhin mah se, fan te’n atana rinawm taka an awm thin leh an din tlatna chu sawifiah rual loh malsawmna a ni a, a mal bik lo tih a inhriat phah fo, a ti bawk.
“Ka lawm a ni, tih mai loh chu sawifiah thiam har tak a ni. Ka hla in lo ngaithla a, in lo ngaina a, hmangaihna leh duhsakna inlantir tir thin hi a va lawmawm chungchuang tak em!! Ka mal bik lo tih hriatna min neih tir fo avangin ka lawm a, ka hringnuna tawrhna nasa tak a lo thlen châng pawhin ka inbunruahna leh in ‘share’ thei tura in lo awm ṭhin hi vannei tak ka ni.
“Lawmna sawi hleih theih loh in chungah ka nei a, ka tana in inpekna leh inhlanna vang-in lawmthu ka hrilh a che u. Ka hmangaih em em che u a ni,” tiin a sawi.