Sorkar laipui thupek anga Centrally Sponsored Scheme (CSS) sum thahnem tak pek chhuah a nih hnua Mizorama treasury lian pahnihin kar khat dawn sum an pe chhuak thei tawh lo va. Sorkar sum harsatna avang hian sorkar hnathawk hlawh lak hun tur a la hriat theih rih lo.
Finance department thupek angin Aizawl South Treasury-in kar hmasa khan CSS sum Rs vbc 400 chuang a pe chhuak a, North Treasury-in vbc 2 chuang a pe chhuak bawk.
Hemi avang hian sorkarin sum leh paiah harsatna a tawh phah a. Treasury lian ber, Aizawl South Treasury-in July 22 thleng khan sum an pe chhuak a, July 25 atang khan bill pass a ni tawh lo tih South Treasury hotuten The Zozam Times an hrilh.
Ni li chhung bill an pek chhuah tawh loh hnuah pawh sorkar atangin thu thar an la dawng lo tih an sawi a. Sum harsatna hian sorkar hnathawk hlawh a nghawng dawn leh dawn loh an hriat loh thu South Treasury hotute chuan sawiin, “June thla hlawh kan pek theih leh theih loh tur chungchang chu finance department hotute thu thu a ni,” an ti.
Sum pek chhuah lam chi reng reng ti thei lo mah se bill erawh an la dawng reng tih South Treasury hotute chuan an sawi.
Aizawl North Treasury pawhin sum an pe chhuak thei tawh lo bawk a, July 20 kha sum an pek chhuah hnuhnung ber a ni a, hemi nia sum an pek chhuah chu CSS sum a ni.
July 21 atanga tun thlengin bill pass an la nei lo tih North Treasury hotute chuan an sawi a, South Treasury ang thoin bill lut thar erawh an dawng reng thung tih an sawi.
State sorkarin sum leh paia harsatna a tawh mek avang hian sorkar hnathawk hlawh lak chungchangah thuthang a tam hle a, hemi chungchang zawhna chhangin finance department hotute chuan tun dinhmunah hlawh chungchang chu sawi theih an nei lo a, grand an hmu hun hunah an pe chhuak dawn tih an sawi a ni.
Bei hi dawng thin mang e, sawrkar a broke 😂