United States Speaker Nancy Pelosi chuan Taiwan a chhuahsan ta a, a tlawh hun chhung rei lo mah se sawi a hlawh hle thung.
Pelosi-i hi kum 25 chhunga US politician hlunin he thliarkar a tlawh leh hmasak berna niin an khawpui, Taipei-a hruaitute a kawm hnuah Nilaini khan a chhuahsan.
Asia khawmualpui a tlawh paha a zinna, Taiwan-ah hian châm rei lo hle mah se sawi a tam hle a, Beijing phei chuan a hmaa tlawh lo tura vawi tam an tih zah lova tlawh a nih avangin a thinrim hle.
Taiwan hi mahnia ro inrel an ni a; mahse, China chuan an province inlahrang anga ngaiin inzawm khawm leh a tum.
Nilainia Chinese Foreign Minister Wang Yi-a thuchhuahah chuan, “Mei hmanga infiam chu a tawpah a tha lo thin a, China dodal chu hrem an ni ang,” a ti.
“US hian China ram hranna chu mipui rorelna kalphunga chhalin zah lo takin a palzam a ni,” a ti.
‘One China’ policy hnuaiah Chinese sorkar pakhat chauh awm tumna a awm a, US pawh hi Beijing nen inzawmna pangngai an nei a, Taiwan nen a hrangin an nei lo.
Hetih rual hian thliarkar nen hian official lem lovin inkungkaihna erawh an nei tha a, a invenna turin Taiwan hnenah hian ralthuam hial an hralh.
US House of Representatives speaker a nih angin Pelosi-i hi president dawta Vice-President Kamala Harris hnuah president ni thei hnai ber a ni.
Taiwan a tlawh chhan let nan hian China chuan Taiwan atanga km 10 leka hla tuipuia sipai nunchan zir chu ‘tul leh leh tih ngei ngai’ tiin a chettir nasa.
Chinese sipaite chet velna hi Ningani atanga tan tur niin ni nga chhung a awh dawn a, khawvela lawngten an zawh tam ber tuipui chunga neih tur niin hmun hla tak kap thei ralthuamte pawh an kap ang.
US thuneitu sang pakhat chuan Nilaini khan Reuters news agency hnenah Beijing hian boruak tihtan lehzualna atan a hmang thei dawn niin a sawi a. Chinese defence ministry thupuangtu, Sun Li-fang pawhin sipaite nunchan zir hian Taiwan tuipui chin pawh an dai dawn tih a sawi.
President Tsai Ing-wen chuan Taiwan-in sipai chakna hmanga rumthaihna nasa tak an hmachhawn niin a sawi a. “Kan zam mai dawn lo va, Taiwan hian amaha a inven ve theihna a neih chu a tichak zel ang,” a ti.
Taiwan-a lawngchawlhna thuneitute chuan sipai nunchan zir an tawn loh nan kalkawng thlang uluk turin an ti a. Transport Minister Wang Kwo-tsai chuan Taipei-in an thenawm, Japan leh Philippines biain thlawhna kawng pawh a dang an dap tih a sawi.
Thawhlehni zana Pelosi-i’n Taiwan a thlen hma pawh khan Chinese indo thlawhnate chu tuipuia Taiwan nena an inthenna bul lawk lawk thlengin an thlawk a ni.Pelosi-i’n Taiwan-ah eng nge a tih?
Speaker Pelosi-i hi ruahman lawk angin US sipai thlawhna hmangin Taiwan-ah Thawhlehni zan khan a lut a, a cham rei lo hle.
Nilainia President Tsai-a nen an inkawmnaah Pelosi-i hian Taiwan-in a mipuite zalen leh inhmangaih taka awm tura a tih theihnaah a fak.
America-in ‘Taiwan-a mipui rorelna a awm theihna tura tha thawh a intiamna chu a la nghet tawk’ tih a sawi bawk.
“Kum 43 liam taah khan America chuan Taiwan kianga awm reng a lo intiam tawh a. Vawiinah kan palaite chu Taiwan-ah kalin Taiwan laka kan intiamna chu kan theihnghil lo a ni tih chiang taka tihlan a ni,” a ti.
Kum 82 mi, Pelosi-i hian president a kawm hma hian Taiwan Deputy Speaker of Parliament Tsai Chi-Chang a kawm bawk.