I&PR Minister Lalruatkima chuan August 10 bawr velah sorkar hnathawk hlawh pek hman beisei a nih thu a sawi.
MNF Sub-Headquarters, Lunglei buatsaihin nimin khan Leadership cum Media Training, Saikuti Hall-ah neih a ni. He hun hmanpuitu khuallian Lalruatkima chuan, “Sum harsatna hi tun hnaia thleng chauh a ni lo a, Congress sorkar hmasa hun chhung zawnga kan hriat a ni. Mi tam tak nunna suattu Congress sorkar zu zawrh pawh kha sum harsatna phuhrukna tura zu chhiah an it vanga zuar an ni,” a ti.
Tun dinhmunah theihtawp chhuahin sorkar chuan sum harsatna sukian turin tan a lak mek zel avangin mipuite tan thlaphanna tur a awm lo tih sawiin, “Vawiin aia hun khirh leh harsa zawkah pawh min lo hruai kai tawhtu kan Pathian hian min hruai chhuak ngei ang tih kan ring a ni,” a ti.
Sum harsatna thleng mek hi Mizoram chauh a ni lo tih sawiin MNF Publicity Board chairman chuan, “India ram state hrang hrangte pawh an buai hlawm hle a ni. Ministry of Finance-in July 1 atangin CSS kalhmang tidanglamin, PFMS kaltlanga pek chhuah zel tur a ni a, CSS Implementing Department-te pawh Single Nodal Account (SNA)-ah sum dah zel tura tih an nih tak vang a ni. Keini state chauh buai fal bik kan ni lo tih hi mipui hriatah ka sawi duh a ni,” a ti a; tun dinhmunah department hrang hrangten hmasawnna hnathawhna tur sum SNA-ah an kawl tam vanglai tak zawk a ni thei tih a sawi.
Lalruatkima hian Congress sorkar hun lai, kum thum chhung (2012-2015) Ways & means-in RBI-ah vawi 118 pawisa puk a ni a, kum 2012-2013 atanga kum 2014-2015 (Nov 1, 2014) thleng khan RBI-ah nasa takin sum an puk tih a sawi a. “2013-2014 RE thleng khan leiba Rs. vaibelchhe 5,455.95 zet kan nei hman a. Vawiinah sum enkawl thu-ah thiam nei bik anga mipui hmaa an sawi mai hi a dik lo a, an hun lai, kum 2015 Krismas bazar hun laia sum harsatzia leh vanzia kha kan la theihnghilh awm lo e,” a ti.
Sum harsatna bul ber chu thawh chhuah tlem vang nia sawiin, sorkar chuan thawh chhuah tam zawk neihna turin theihtawpin hma la mah se hripui len vangin harsatna a awm tih sawiin, “A bik takin khawlphetha leh ration buhfai sum tam tak a kan lei, mipui phurrit a nih venna tura subsidised a nite pawh hi a hlawm lian zual a ni awm e,” Lalruatkima hian a ti bawk.