China chuan liantham taka sipai nunchan zirna a kalpui chu Pathiannia a tihtawp zet hnuah Taiwan chhehvelah Thawhtanni khan a chhunzawm leh nghal.
Chinese sipaia Eastern Theatre Command chuan tuihnuailawng beihna leh tuipuia mi beihna laka chet dan an zir tih an sawi.
A hmaa ni li chhung nunchan an zir kha Beijing-in United States House Speaker Nancy Pelosi-i’n thliarkar ram a tlawh a chhan letna a ni.
Taiwan chuan tuna China-in sipai nunchan an zir chu an thliarkar rûn tura a tihchhinna niin a puh.
Thawhtanni khan Taiwan hian Chinese thlawhna leh lawngte chuan an ram tuipui chin an dai lo tih a sawi thung a, an tuipui hi khawmual atanga tuipui mel 12 bial (km 22) a ni.
US, Australia leh Japan chuan nunchan zir hi an dem thu an sawi hlawm a, an tum chu Taiwan Strait an tih, Taiwan leh China inkara km 180-a zau tuipui awm tuma khawih theih loh tura dah hmuna boruak tha lo siam tumna mai niin an sawi.
Chinese thlawhna leh lawngte chuan strait-ah hian an inrina an pel nia sawi a ni.
Washington chuan Pelosi-i’n Taiwan a tlawh avanga Beijing-in an thawhhona thil dang, sik leh sa inthlak dona lam thlenga an inkar a tichhia chu tha lo a tih thu a sawi.
Beijing chuan Taiwan hi an province pakhat, ro inrel hran angin a chhal a ni a, a tul a nih chuan sipai chakna hmanga thunun mai theih angin an ngai.
Taiwan erawh chuan ro inrel hran thlap, China atanga hrang niin an inngai ve thung.
Ram hruaitu thenkhat chuan ram hran anga pawm mai ni awm taka sawina an nei zeuh zeuh thin reng a, hei hi China chuan a haw hle.
Thawhtanni atanga Taiwan chhehvela sipai nunchan zir kalpui thar leh hma lawk hian Chinese tuipui thuneitute chuan hmun danga an neih tur thu an lo sawi tawh.
China leh Korean peninsula inkara awm, Yellow Sea-ah pawh Inrinni atang hian August thla laihawl thleng nunchan an zir dawn a, hmanrua pawh a tak tak an hmang ang.
Yellow Sea hmar lam, Bohai sea an tiah pawh Inrinni atang khan Chinese sipaite hian thla khat awh tur beihpui an thlak mek bawk.
Thawhtanni vek khan China chuan South China Sea vaukamah hmanraw tak tak nen sipai nunchan zir an kalpui dawn tih a sawi bawk.