Indian Council of Medical Research (ICMR) chuan India rama Covid-19 laka invenna damdawi hman rim ber pahnih, Covishield leh Covaxin hman kawp chu a pawina a awm lo va, a thawh tur ang a thawk tha tih a sawi.
News agency ANI-in a tar lan dan chuan invenna damdawi chi hnih hman a that leh that loh hi Uttar Pradesh-a Siddharth Nagar-a cheng mi 18-ah enchhin a ni a, anni hi tum reng vang pawh ni lo, tihpalh thila pek hmasak leh hnuhnunga damdawi inang lo pek an ni.
Tihsual palh zarah hian a thawk tha tho em tih chu zir a ni a, hetah hian a dawngtute hian an taksaah coronavirus dan theihna an nei tho tih hmuh a ni a, a tha zawk mah niin an sawi bawk.
Pune-a Serum Institute of India-in a siam, Covishield hi adenovirus vector platform-based vaccine niin Covaxin hi Bharat Biotech leh ICMR tangkawpin an siam a ni thung a. An pahnih hian an siam dan kalhmang inang lo a ni.
‘Serendipitous Covid-19 Vaccine-Mix in Uttar Pradesh, India: Safety & Immunogenicity Assessment of a Heterologous Regime’ tiin damdawi inang lo hmangtute zirna ni medRxiv-ah tar lan a ni.
Mi 18-te dinhmun zir nan hian Covishield leh Covaxin bikima dawng mi 40 ve ve dinhmun nena khaikhin an ni a. May leh June, 2021 inkar khan zir chian an ni.
Covid-19 laka invenna damdawi hrang hrang siam chhuah tawhah vawi (dose) hnih lak deuh zel a ngai hlawm a. A hmasa leh a hnuhnunga damdawi inang lo thawh dan hi khawvel pumin a ngaihven a ni a, India-ah pawh zir chian tawh thin a ni.
Central Drugs Standard Control Organisation hnuaiah subject expert committee chuan July thla khan Covishield leh Covaxin hman kawp hi a him em tih leh, hri leng kai tur ven nan a tha tho em tih zir turin Christian Medical College, Vellore chu zirna tura inpe mi 300-ah zir turin a lo ti tawh nghe nghe.