State pahnih inkara ramri buaina chungchang sawihoa nikuma dawhkan khat kila inbiakna an neih hnuah Mizoram leh Assam sorkar aiawhte chu vawiinah Aizawlah an inbe leh dawn.
Ramri buaina avanga nikum July 26-a Assam leh Mizoram Police te an inkah hnu, August 5 khan Assam sorkar aiawh minister pahnih leh sorkar hotu dangte chu Aizawlah rawn kalin Mizoram sorkar aiawhte nen hmaichhanah an inbia a, hemi hnu hian video conferencing hmang pawhin inbiakna an nei leh thin.
State pahnihte inkarah hian boruak sang tak awm rih lo mah se ramri chungchanga an buaina hi tihfel a la ni lo a. July 7, 2022 khan Assam sorkara Border Protection & Development Minister Atul Bora chuan ramri chungchangah inbiakna neih an duh thu hi Home Minister Lalchamliana hnenah a rawn thlen a, hemi bawhzui hian inbiak a ni leh dawn a ni.
Ruahmanna an siam dan chuan Assam sorkar aiawhte hi vawiin chawhma dar 10:45-ah Aizawl an rawn thleng ang a, chawhnu dar 2:30-ah Aijal Club-ah an inbia a, hemi hnuah chawhnu dar 3:30-ah state pahnih aiawhte hian press conference an nei zui dawn a ni.
Assam sorkar aiawh hian Border Protection & Development Minister Bora bakah Housing & Urban Minister Ashok Singhal leh sorkar hotu dang mi pathumte an tel ang a, Mizoram sorkar aiawhin home minister, Information Minister Lalruatkima leh home commissioner te an tel dawn a ni.
Assam sorkar aiawhte hi Thawhlehni zanah Aizawlah an riak ang a, hemi zan hian Mizoram sorkarin an pualin cultural programme an buatsaihsak dawn a; Nilaini chawhma dar 10:30-ah Chief Minister Zoramthanga chu a pisaah an kawm bawk dawn a ni.