Inrinni kaltaa Serchhip leh Thenzawl inkar Mat luia tla, VL Hmangaihzuala, kum 15, Thenzawl Vengchhak ruang zawn chhunzawm zel a ni a. Serchhip bialtu MLA Lalduhoma pawhin tui tla zawngin hnatlanga a thawh chhuah bakah bungraw mamawh a pe.
Thenzawl Joint YMA leh Joint VC bultumin tui tla zawngin tui tla zawn hna chu nimin khan neih chhunzawm niin, Thenzawl, Serchhip, Keitum, Buangpui, Zote, Kanghmun, Sialsuk atangin mi tlawmngai thawk chhuakten Mat dung tluanin, hmun hrang hrangah lawngleng leh pum hmangtein an dap a.
Inrinni atang khan Thenzawl YMA te'n Mat phai thlam remchangah an riah chilh a. Pathianni zan khan tui thiam, Sairang Dinthar Branch YMA member 11-te chu tui la zawng tur hian an thleng bawk a. He chanchin buatsaih lai thleng hian ruang hmuh a la ni lo.
Serchhip bialtu MLA Lalduhoma pawhin nimin khan a bial Thenzawl khaw rawlthar tui tla zawnnaah hian hnatlangin a thawk chhuak a. VL Hmangaihzuala tui tlakna hmun atanga Mat phai, Chawmkai thleng lui dung zawh thlain ruang zawngtute a tawiawm a ni.
Inrinni khan bialtu MLA Lalduhoma hian tui tla zawngte tan Rs 2000 a pek hnuah, nimin khan tui tla zawngte mamawh generator hman tur a tum sak bakah tuizem, hruisen, buhfai bag hnih leh silpouline eng emaw zat a pe bawk.
A bial mipuite Mizo tlawmngaihna par chhuah tira, tui tla zawnga tlawmngaia mi thahnem tak an thawk chhuak chu lawmawm a tih thu sawiin Lalduhoma hian, Serchhip bial mai bakah bial pawn lam khua atanga tlawmngaia thawkchhuak an awm chu ropui a tih thu a sawi a, tui tla zawngte mamawh leh tul awm, a tih theih ang te chu a theih chinah tihsak zel a inhuam thu a sawi bawk.
Tui tla zawngtute mamawh chi hrang hrang tanpuina mi thahnemngai eng emaw zatin Thenzawl Joint VC leh YMA hnenah an pe tawh bawk a ni.