AIZAWL: Dr. Vanlalthlana, MLA-in “Mipuite hian beisei ram kan nei a, kan kutah hian thiltihtheihna a awm a, thiltihtheihna kan nei a, kan ropui a, mahse kan dawih si, kan dikna chanvo pawh kan humhalh ngam lova, tunah hian kan tuiek zo ta a ni,”a ti.
ZPM party chhung inkhawm nimina neihah he thu hi Dr Vanlalthlana chuan a sawi a. “Covid 19 avangin sum kan harsa tih sawi thin a ni a, Covid-19 dona atan 2020-2021 a tantirh kumah khan budget atangin 0.30% an seng a. Kum 2021-2022 covid hluar em em lai khan 0.64% budget atangin an seng" tiin, "Covid dona atan state budget atanga chhutin zaah Rs. 1 pawh sorkar hian a seng lo, Covid-ah kan inseng hnem an tih hi chu a lo ni lo tawp a ni tih hi mipui ten kan hriat a ngai" a ti.
Sorkar sum harsat chhan pakhat chu Airport cheinaa sum sen tam vang niin Dr Vanlalthlana chuan a sawi a. "Airport siamna atana sum sen zat khu sorkar department 30 dawnin budget atana an neih phak loh a ni" tiin, "Sum siamna atana budget kan hman avang zawk hian kan harsa a ni tih hi mipui ten kan hriat a ngai" a ti.
Dr Vanlalthlana chuan "Chhungkaw pa berin a pawimawh lai sorkar hnathawk hlawh leh inenkawlna tur chi hrang hrang dah lovin tu tute emaw intihlenna tur, hnam run mai ni lo, hnam run zuankan thei te an awm a. Chungho atan chuan restricted tender te, work order awm hma daiha hna inthawh tir thin a nih avang hian sumah kan harsa ta a ni,” a ti bawk.
Tuna CSS sum chhuak huk tur leh Mizoram sum dinhmun a nghawng dan tur te chu session liamtaah ZPM legislature party member ten an zawt tawh nia sawiin, Dr Vanlalthlana chuan a chhanna erawh an dawn loh thu a sawi a. "Nikum kumtir atang khan CSS sum hi sorkar hnenah a thleng a, sorkarin pechhuak leh tur a nih laiin thil dangah a pawtpeng a, a lo pawhpenna an dahthatna, K-deposit ah an dah a, a hminga awm siin, a pawisa erawh khawi khawiah emaw an pawtpeng a, 'a dang a lo thlen hunah kan rul leh mai ang' tih a ni a, rulh hleihtheih loh te a awm chhova, sorkar hi harh sela tang rawh se, tiin kan lo au tawh thin a, muhil der kaihthawh tum hi thil har tawp a lo ni a, kan inkaiharh zo lova, loh theihlohin central lamin an rawn kuk tho ta a ni,” a ti.
Dr. Vanlalthlana chuan, “Tuna min hruaitu, kan sorkar neih mek hi an sorkar hmasaka India ram pumpui a thawhchhuah atanga teha leiba ngah ber a ni" a ti a. "An sorkar vawi hnihna 2003 atang 2008 chhoah phei kha chuan tuna Sri Lanka tlukchhiatna chhan an tih, leiba ngah lutuk, thawhchhuah aia tam leiba neiin min hruai tluan chhuak" tiin, "Tun budget session budget speech-ah khan kum li chhunga leiba neih belh tura an inbeisei zat chu cheng vbc 4500 a ni" a ti.
"Congress sorkar lai khan kum 10 chhungin cheng vbc 4700 in leiba a pung a, MNF sorkarah kum li chhungin cheng vbc 4500 in a pung dawn" Dr Vanlalthlana chuan a ti a. "Hei hi kan sum enkawltute min kalpui dan a ni. Mipuite kan ngaih a tha lova, chuvang chuan kan auchhuah a ngai a ni,” a ti bawk a ni.