Aizawl : Mizoram state child protection society, Aizawl leh district legal services authority, Champhaite tangkawpin nimin khan Khawzawlah Khawzawl district-a naupangte dikna leh chanvo humhalh kawnga thawktu hrang hrang pualin training an buatsaih a, Khawzawl Bawrhsap C.C. Lalchhuangkima’n a telpui.
Khawzawl Bawrhsap chuan Khawzawl district chu district ding thar a nih avangin hmasawnna tur an la ngah hle tih a sawi a. DCPO office mumal taka a ding ta chu lawmawm a tih thu sawiin, hei hian Khawzawl district-a naupang buaipui ngai leh an chunga pawikhawihna thleng thinte buaipui kawngah nasa takin a pui dawn tih a sawi.
Naupangte dikna leh chanvo rahbehsaka an chunga pawikhawihna a thleng thin chu pawi a tih thu Khawzawl Bawrhsap chuan a sawi a. Hemi kawngah hian inzirtirna nasa lehzuala kalpui a tul thu sawiin, Naupangte dikna leh chanvo humhalh kaw- nga inzirtirna Khawzawla buatsaih a ni chu lawmawm a tih thu a sawi bawk.
Training-ah hian Sylvie Zomuanpuii Ralte, Addl. District & Sessions Judge, District Court Champhaiin CWC, JJB leh SJPU te hriattur pawimawh hrang hrangte a sawifiah a. V.L. Chama Hnamte, Social Activist, Champhai leh Jothansangi Tlau, Judicial Magistrate, First Class, District Court Champhai zirtirna an pe bawk a ni.