BJP chuan Kumar-a’n term laklawh laia a thawhpui a thlak chu ‘mipuite phatsanna’ tiin an sawi zui a. Engvangin nge JD(U) chief hian NDA a chhuahsan tihah zawhna tam tak a awm bawk.
Kum 2015 thleng khan Kumar-a hi BJP nena thawkho an ni a; mahse, hemi tum hian kalsanin Lalu Yadav leh Congress ten sorkar an siam a. Yadav-a hi Bihar veteran politician niin tuna a deputy tura an sawi, Tejashwi Yadav-a pa a ni.
Kum 2017 khan Kumar-a hian party pathum tangho chu chhuahsanin a minister pakhat, Tejashwi Yadav chuan a ei ru a, a zah lo nia sawiin a lungawi lo.
BJP nen inzawm lehin sorkar an siam zui a; mahse, an karah neuh neuh a awm nual thin.
June thla khan Kumar-a hian Prime Minister Narendra Modi-a chu an state-a caste census neih phalsak lovah a puh a, he chhiarpui hi Tejashwi Yadav-a thlawp zawng tak a ni mek thung.
Kumar-a hi Union Home Minister Amit Shah-a hmalaknaa JD(U) mite an lama pawh let tumah puhin a lungawi lo bawk a. Chief minister chuan an party hruaitu hlun, union cabinet-a tel, RCP Singh chu JD(U) do zawnga che tura fuihtu niin a ngai a. Singh-a hi Rajya Sabha-a a term tawp hnuah pawh a dintir duh lo ngat a, Modi-a cabinet atangin a chawlh a ngaih phah.
Kartawpah khan Kumar-a lamtangte chuan Singh-a hi ei rua an puhna an au chhuahpui ta hial a, ani pawhin an party a chhuahsan.
Singh-a hi BJP kaihhruaina hnuaia JD(U)-a helna siam tuma hmalatu pahnihna a ni a. Chirag Paswan-a pawh pui vakin inthlanpui hnuhnung berah khan Kumar-a party hian vote tam tak an chân phah tawh.
Paswan-a hian party candidate chu JD(U) a dotir vak a, BJP-in an that phah a. Kumar-a hian Paswan-a a beih chiam pawhin BJP an ngawi tlat thung.