South Korea khawpui, Seoul hmun thenkhatah ruah nasa tak sur avanga tui lianah mi pariat vel an thi a, mi dang 14 velin hliam an tuar bawk.
Thawhtanni zana ruah sur avang hian tuiin kawng leh metro station a chim a, khawpui leh a chhehvel province-ah power supply a awm loh phah bawk.
Hmun thenkhat phei chuan kum 80 chhunga an ruahtui dawn tam ber tum an tawng niin Korea-a meteorological agency chuan a sawi.
Khawchin zirtirte hian ni eng emaw zat chhung ruah hi a la sur zawm dawn niin an sawi.
Thlalak thehdarhah chuan metro pannaa tui luang te, lirthei hunna hmuna car tukverh thleng tuiin a chim te leh mihringin kawtthlera khup thlenga tui an dai lai te a lang.
Tual chhung mite chuan thi zinga pathum hi kawng hnuai lama in, banjiha an tiha cheng niin an sawi.
Chhanchhuah hna thawktute chuan khawlaiah kawng thleng zet tui a tlin avangin apartment tam tak an thleng thei lo tih an sawi.
Seoul hmun thenkhat, khawthlang lama lawngchawlhna khawpui, Incheon leh Seoul hualtu, Gyeonggi province chuan Thawhtanni zan khan darkar khatah ruah cm 10 chuang zet an dawng niin Yonhap news agency chuan a tar lang.
Hetih lai hian Seoul-a Dongjak district-ah pawh darkar khat chhungin ruah mm 141.5 chuang a tla a, kum 1942 hnua a tam ber tum niin Korea-a Meteorological Administration (KMA) chuan a tar lang.
Thi zingah hian electric-in a man pawh a tel a, mi pakhat chu bus stand chimin a delh a, pakhat lei min vangin a thi bawk.
Mi 14-in hliam an tuar a, mi dang paruk chin hriat lohvin an awm mek bawk.