Palestinian hel pawl pakhat, al-Aqsa Martyrs’ Brigades an tiha an hruaitu lawk chu Israeli-ten an luah chin West Bank-a beihpui an thlaknaah an that.
Ibrahim al-Nabulsi leh mi dang pahnihte hi Nablus khawpuia a chenna in an luhchhuahnaah an that a ni.
Palestinian Red Crescent chuan mi 40 velin hliam an tuar bawk niin a sawi.
al-Aqsa Martyrs’ Brigades hi Palestinian movement pakhat, West Bank thununtu, Fatah nena inzawm an ni.
Israel chuan Nabulsi-a an pawla cell pakhat kaihruaitu niin West Bank-a Israeli-te beihna tam tak thlentu niin an sawi.
February-a an luhchilh tumin a thuihhruai pathum an lo that tawh a, Nabulsi-a ber hi a him hlauh niin Israeli chanchinbute chuan an tar lang a. Man ngei tumin umzui char char a nih thu an tar lang bawk.
Thawhlehnia Nablus-a a in an luhchilhnaah hian Israeli sipaite hian a in atanga a chhuah theih nan puta rocket kah chhuahna (shoulder-launched rocket) pawh an hmang.
In chhungah leh khawpui hmun dangah silai pawh a puak nual a, hei vang hian hliam pawh tam phahin thenkhat chu na deuh pawh an awm.
Israeli sipai lamah thi leh hliam an awm lo.
Israeli chanchinbute chuan al-Aqsa Martyrs’ Brigades hi Palestinian Islamic Jihad (PIJ) nen thawk dunin West Bank-a Israeli-te an bitum thin niin an tar lang.
Israeli sipaite hian tun hnaiah West Bank hi an luhchilh zing hle a, an tum ber chu PIJ hel man a ni.
Kar hmasa khan West Bank-a PIJ hotu lawk ber, Bassem Saadi-a an man a, Israeli-te hian Gaza Strip-a PIJ helho chu nasa takin thlawhna atangin an chhu zui a, Palestinian 44 lai thiin an zingah hian hel pawla an commander lawk pahnih an tel.
Helho pawh hian Gaza atang hian chhan let nan rocket eng emaw zat an kap ve a, Israeli eng emaw zatin hliam tenau an tawrh phah.
Ni thum lai hetianga inkah tawnna a thlen hnuah Egypt chuan palai hna thawkin Pathianni zan atang khan inkahhai an puang zui a ni.