State pahnih ramri buaina chungchangah Mizoram leh Assam sorkar palai, minister pahnih ve ve chu nimin khan Aijal Club-ah an in be leh a, nikum August 5-a an inbiaknaa joint statement an siam chu la ding zel se an ti a, inremna chi hnih an siam belh bakah October thlaah Guwahati-ah inbiak leh an rem ti.
State pahnih inkarah inrintawkna a awm theihna tura inbiakna nei tura Mizorama kalte hi Assam sorkar Border Protection & Development Minister Atul Bohra, Housing & Urban Affairs & Irrigation Minister Ashok Singhal te bakah amahni tawiawmtu, Border Protection & Development hotu pahnihte an ni.
Assam sorkar palaite hi Home Minister Lalchamliana, I&PR Minister Lalruatkima, Home Department-a Commissioner & Secretary H.Lalengmawia leh home deparment hotu dang pahnihten lo dawngsawngin Aijal Club-ah darkar hnih dawn an inkawm a, joint statement an siam dun leh a ni.
Joint statement an siamah hian August 5, 2021-a an inkawm tuma joint statement an siam chu la ding zel se an ti a, ramri-ah harsatna a awm loh nan ramri hrula district-a deputy commissioner-te chu thla hnih danah vawi khat tal inbia se, an ti.
Heng bakah hian state pahnih ramria huan leh leilet neitute eizawnna kawngah harsatna insiam loh nise, thuneitu phalnaa dan ang thlapa kal chhunzawm zel ni se, an tih bakah state pahnih palaite chu October thla ral hmain Guwahati-ah inbiak leh nise an ti bawk.
An inbiak zawhna chanchinbumite an kawmnaah Home Minister Lalchamliana chuan ramri buaina chu chuti maia chin fel mai theih a ni lo tih sawiin, Assam sorkar palaite nena joint statement an siamte chu Mizoram State Boundary Committee-ah an thlen leh dawn tih a sawi a; an inbiak leh hunah chuan ramri chungchang chu kimchang zawka an sawiho tur thu leh hmasawnna a awm tawh ngei a beisei tih a sawi.
July 26, 2021-a state pahnihte an inkah chungchang Mizoram leh Assam sorkarin FIR an thehluh chu police lamin an withdraw mai theih a ni lo a, judiciary kuta awm a nih thu leh Guwahati-a an inbiak hunah sawiho leh an tum thu home minister chuan zawhna chhangin a sawi.
Lalchamliana chuan, “Tun tuma Assam sorkar palai rawn kalte hian an rawn kal chhan chu state pahnih inkarah inrintawkna a awm theihna tura hma la an nih thu an thutkhawmnaah hian an sawi,” a ti a, Mizoram sorkar lam pawhin Assam palaite hmalakna chu lawmawm an tih thu a sawi a ni.
Border Protection & Development Minister Bohra chuan state pahnihte inrintawnna boruak siam tura lokal an nih thu a sawi a; ramri chin fel duh em emtu, Mizoram Chief Minister Zoramthanga leh Assam Chief Minister Dr. Himanta Biswas Sharma te hmalaknaah a lawm thu a sawi.
Assam sorkar palaite hi nizan khan Mizoram sorkarin an pualin cultural programme an buatsaihsak a, vawiin chhun dar 10:30-ah chief minister an kawm leh ang a, chawhnuah Assam an pan ang.
Tar lan tawh thin angin nikum July 26-a state pahnih police-te an inkah hnu, August 5 khan Assam minister pahnih hi remna zawngin Aizawlah an zin a, Mizoram sorkar aiawhte nen Aijal Club-ah vek an lo inbe tawh a ni.