- Ruata
Tata Motors chuan Tigor XM iCNG variant thar an tichhuak leh ta a, he car hi Rs Nuai 7.40 (ex-showroom price, Delhi) man a ni dawn a ni.
Tata hian kumin kumtir lam khan an hatchback lirthei pahnih Tigor leh Tiago-ah te CNG (gas) hmang hi an tichhuak a. He CNG model hi market lamin a che tha ta em em mai a, heng CNG variant an tlangzarh vang te pawh hi aniang he lirthei model pahnih hian an hralh san ber tum an tawng a, hei hi thla hmasa khan a ni a. Ramchhunga lirthei leituten he lirthei, CNG hmang hi an lo duh viau mai a ni a, a la chet that chhoh zel te pawh beisei a ni a, tuna variant thar an tihchhuah leh pawh hian nasa takin a pui dawn a ni.
Tuna an tihchhuah thar Tata Tigor XM iCNG hi Tata Tigor iCNG bika a man tlawm ber tur (entry level) a ni dawn a. Hmanraw tangkai tak tak bakah himna lam hmanraw rintlak taka thuam a ni a. He variant thar hian HarmanTM infotainment system with 4 speaker system, power windows, central locking, rear parking sensors leh a dang te a nei nual a. Tata Tigor XM iCNG variant hi rawng chi 4 – Opal White, Daytona Grey, Arizona Blue leh Deep Red te a awm dawn a ni.
He lirthei an tlangzarh chungchangah hian Rajan Amba, Vice President, Sales, Marketing and Customer Care, Tata Motors Passenger Vehicles Ltd. chuan Tata Tigor chu an oirthei zinga ‘special’ tak a nih thu a sawi a. Tuna he lirtheia CNG version an siam pawh hian he model hi a thuam tha zual sauh a, a ti hlu lehzual hle tiin a sawi a, he lirthei hi market-a a chet that theihna turin nasa takin company lam pawh CNG an tichhuak hian a puih nasat thu a sawi a ni.
Tunah hian Tata Tigor book tu zaa 75 chuan iCNG variant hi an book vek a. Hei hian iCNG demand a san zia te pawh a tilang chiang awm e. Hei vang tak hian iCNG variant bik hi duhthlan tur dah belh a ni a, iCNG lo lei ve duh te tana duhthlan tur a tam theih nan leh a man tlawm hret duh te tana thu lawmawm tak ni turin he XM iCNG tihchhuah a nih thu company hotute chuan an sawi bawk a ni.
Tata Tigor hi India rama sedan zinga Petrol, Electric leh CNG bakah Manual leh Automatic transmission nei kim thap awmchhun a ni a. Tuna an tihchhuah XM iCNG hian 1.2-litre BS6 khawl hmangin 73.4PS power (6,000rpm-ah) leh peak torque 95Nm a pechhuak thei a. A power leh torque hi 13PS leh 18Nm in a petrol variant aiin hniam zawk a ni.
Safari thar
Tata lirthei sawi takah chuan tuna chanchinthar rawn nei leh deuh chu 2022 Tata Safari a ni a. Hei hi tuna chhuak mek an update leh hlek na tur a nih hmel a, tunah hian an enchhin lai thlalak leh video pawh hmuh tur a awm leh nual tawh a. A chanchin kimchang tur erawh company lam atanga puan chian a la awm lo a, an tihchhuah hun tur pawh an la sawi rih lo a ni. Report thenkhat chuan 2022 Tata Safari lo chhuak tur hian 360 degree camera leh ADAS (advanced driver assistance system) a rawn niin an tarlang a, he SUV thar hi kumin Diwali chhoah emaw tun sorkar financial year tawp lamah emaw hian an tihchhuah beisei a ni bawk.