MZP gen. headquarters, Aizawlin nimin khan Farkawn leh Zokhawthar-ah Myanmar rama Zohnahthlak zirlaite tan zirlaibu leh naupang Bible thahnem tak an hlan.
Zirlaibu leh naupang Bible te hi Zokhawthar YMA hall-ah inhlanin, MZP President Lalnunmawia Pautu-in Hualngoram peoples organisation (HPO) hnuaia din Education working committee kutah a hlan a. Myanmar ram buaina avanga zirlai ten rei tak zirna an chhunzawm thei lo chu pawi an tih thu sawiin, zirlai ten an zirlai an chhunzawm theihna tura an zirlaibu tur chu ngaihtuahsak an nih thu an sawi.
MZP President chuan "Mizoram mipuiin ral tlante tan theih tawp chhuahin ṭanpuina an pe ṭhin a, kohhran leh NGO hrang hrangin theihtawpa hma lain, khawngaihna leh hmangaihna an lantir a. Chutihlaiin, mi duham mi then- khatin Mizoramah ruihhlo an tawlh lut ṭhin a, he thil hi MZP chuan pawi a ti takzet a ni" a ti a. "Heng thil ṭhalo titawp tur hian theihtawp kan chhuah tlan a ṭul a ni" a ti bawk.
HPO hnuaia education working committee chairman C Thangkima pawhin Myanmar ram buaina avanga rei tak zirna sikul hawn theih a nih loh thu sawiin, mipui sorkar National unity government (NUG)-in mahni hnam nunphung mila zirna kalpui a remtih avangin Mizoram syllabus zir ṭha an tih thu a sawi a. MZP-ah an mamawh an thlen a, an mamawh zirlaibu thehnem tak an lo ngaihtuahsak avanga an lawm thu a sawi.
Myanmar rama Hualngoram huamchhungah hian khaw 56 awmin, an ram buaina avangin khaw hnih chu raihsan a ni a. Township pathum - Falam, Teddim leh Tonzang township te awmin, HPO Education working committee hmalaknain khaw 35-ah zirna kalpui mek a ni.
MZP-in zirlaibu an hlan te hi pawl 1 aṭanga pawl 10 zirlaibu, mithahnemngaite pekkhawm niin, subject khat zirlaibu 100 zel a ni a, Chin Baptist Church, USA-in a phurh velna senso an tum a, Mother of Chin Relief Committee (MCRC)-in Naupang Bible an pe bawk.