Mipa pahnih, Delhi-a kartut 2,000 chuang phur luttu leh an thawhpui mi palite chu auto rickshaw driver-in a rinhleh avanga police hnenah a hrilh hnuah man an ni.
Heng mite hi Anand Vihar bus terminal bulah man an ni a. India-in Independence Day lawm tura a inbuatsaih ngawrh lai, police pawh an inralrin hle laia man an ni.
Additional police commissioner (eastern range) chuan mipa pahnih thu an zawh fiah hnuah an thawhpui dang pali an man tih a sawi a. An zingah hian Dehradun-a silai lam zawrhna leh thingpui dawr neitu, Parikshit Negi pawh a tel tih a sawi.
Police chuan kartut hi 2,252 an man tih an sawi a, Lucknow-a mi pakhat hnena an dah niin an sawi a. “Independence Day dawn a ni a, police-te pawh kan inringin kan beng kan chhit ngun vanglai a ni a. August 6 zing dar 6.30 vel khan driver hian police hnenah mi rinhlelhawm tak, ip lian tak keng a hmuh thu hi a sawi a ni,” Singh chuan a ti.
Police-in an bawhzui a, mipa pahnih hi thil hnuh chi nen an hmu ta tih a sawi a. “Police-in an hmuh lai hian an hlauthawng hle a, an kawng an thlak a, tlanchhiat an tum zui a, man an ni a, an ip en a nih chuan puak thei kaihhnawih tam tak hmuh a ni ta a ni,” a ti.
Police chuan kartut an mante hi a chi hrang hrang a nih thu leh rifle, pistol leh tualchher revolver-ah a hman theih thu an sawi a, mi firfiak dang inrawlh an awm em tih an chhui zui mek tih an sawi.
Police chuan Uttar Pradesh-a Jaunpur district-a mi, Ajmal Khan leh Rashid chuan heng thil hi Dehradun-a mi pakhat hnen atanga an dawn thu leh Lucknow-a an dah thu an sawi a. “Tun hma pawhin hetiang hi an lo kalpui fo a ni,” tiin Singh chuan a sawi.
Police hian Lucknow, Jaunpur leh Dehradun an dap nghal a, August 6 leh 12 inkar khan mi pali dang hi an man ta a. Negi-a hi Dehradun-a an man niin kartut chi hrang hrang a pe kual thin a, thu an zawhna zarah police hian Delhi-a cheng Kamran-a leh Roorkee-a cheng Nasir-a an man theih phah niin an sawi.
“Negi-a hian silaimute pawh a hralh thin a, a tih dan hi dan bawhchhiatna a ni a. Lehkhaa a inziah dan chuan silai lam thil hi license neite hnena hralh leh leitir thin angin a inziak a; mahse, kan chhuinaah chuan tuna Meerut-a lung ina tang mek pakhat pawh hetiang a tihkualnaah hian a inrawlh niin a lang,” tiin investigating officer chuan a sawi.
Dan lova silai siam hi thil har a ni lo va, Uttar Pradesh, Madhya Pradesh leh Bihar-ah phei chuan a tam hle a; mahse, a mu siam tak hi a harin a man a to hle a. Mi sualte hian awlsam zawka silaimu an neih theih nan silai zawrhna dawr hi an hawn phah fo reng a. Dawr pangngaiah pawh a neitute hian an chhinchhiah chinah chuan silai license nei ngei hnena hralh angin a lang a; mahse, heng mite kaltlang hian mi sualin a mu leh an mamawh dang an lei thin thung.
Kuminah pawh Delhi Police chuan silai license neite chu a mu leh an silai hman theih chin an hman dan tihlanna thehlut turin an lo ti tawh a. Dawr neitute hnenah pawh silai lam thil chu license nei hnenah pawh sorkara certificate nei lo hnenah chuan hralh lo turin an lo hriattir tawh a ni.