Indian billionaire Rakesh Jhunjhunwala chu kum 62 mi niin a thi a, ram punah a sunna leh an ui thu mi tam takin an sawi.
Stock market atanga hausa, Jhunjhunwala hi Pathianni khan Mumbai khawpuia damdawi inah a thi a ni.
A thih chhan tak hi thuneituten an sawi lo va; mahse, mi thenkhat chuan a kal tha lo vang niin an sawi thung.
‘India ram Warren Buffett’ tia an sawi mai thin, Jhunjhunwala hi Forbes chanchinbu chuan $ tluklehdingawn 5.8 vel nei angin a chhut.
Amah hi kum 1991-a India-in sumdawnna lama a kal dan a siam thatna chhawrtu zinga mi niin investor lian takah a insiam a ni.
Prime Minister Narendra Modi chuan Jhunjhunwala hi Indian stock market-a thil hlu tur chhut lawk thiam a nih thu a sawi.
“Sumdawnna lam hre thiam tak a ni a, bawh tur hre em em a ni a, tumna lian tak nei leh thil tam takah thlir dan bik riau nei a ni,” tiin sumdawng, India-a brokerage lian ber pawl neitu, Motilal Oswal chuan Jhunjhunwala chungchang hi a sawi.
Jhunjhunwala hian tun hnai lawk khan Akasa Air chu a pui a, anni hi chuan man tlawm zinga airline din thar ber niin August thla tirah an thlawk tan chauh a ni.
Covid hripui avang khan India-ah hian ram chhunga thlawhna hmanga zin chu kum hnih vel a chawl titih a, kuminah erawh a sang chak leh mek thung.Jhunjhunwala zinkawng
Income tax officer fapa, Jhunjhunwala hian stock market lam hi naupang a nih lai, a pain market-a investment a tiha a balance neih a chhut vel atang daih tawhin a hmelhriat tih a sawi thin.
Kum 25 mi a ni lai, kum 1985 khan Jhunjhunwala hian stock market-ah a invest tan a, an chhungte hnen atanga pawisa a puk $100 hmangin bul a tan nia sawi thin a ni nghe nghe.
Rare Enterprises a din zui a, a hming hi ama hming leh a nupui, Rekha tiha hawrawp hmasa pahnih a lak dun a ni.
Investment a tihnaah hian a chang chuan huai takin risk lak chang a nei ve fo va, tam tak a chân tum pawh a tawng ve fo thin.
Kum 2021 khan Forbes chuan Jhunjhunwala hi ‘stock lei lama taka hlawkna chang tura thuam bik’ ti hialin a tar lang a, tun hnai maiah khan a private equity investment chu tam tak a hralh bawk.
Kum 10 liam taah khan Reuters-in an kawmnaah ‘India Warren Buffett’ tia an sawi thin chu a duh lem loh thu a sawi a, Berkshire Hathaway CEO chu ani lakah chuan hetianga koh phua chungnung zawk fe a nih thu a sawi a. “Tute emaw anga siam (clone) ka ni lo va, Rakesh Jhunjhunwala ka ni tawp mai,” a ti.