Jammu & Kashmir-a Baramulla district-ah, Hyderbeigh-ah India Hnam Puanzar chu feet 108-a sangah Pathianni khan zar a ni a, hetianga sanga zar hi Kashmir hmar lamah chuan a vawi khatna a ni.
Sorkar laipuiin ram indan kum 75-na puala Har Ghar Tiranga campaign a thlak mek bawhzuina atana hetianga tih hi a ni.
GoC Kilo Force Major General SS Slaria chuan, “Hetianga tih hi Kashmir hmar lama a vawi khatna a ni a. Heng lai vela chengte chungah ‘Har Ghar Tiranga’ campaign an tihhlawhtlin avangin lawm thu ka sawi,” a ti.
Pathianni vek khan Lieutenant Governor Manoj Sinha chuan Jammu & Kashmir-a Srinagar khawpuiah Border Security Force-in ‘Azadi ka Amrit Mahotsav’ (AKAM) puala Tiranga rally an buatsaih chu a hmanpui bawk.
‘Har Ghar Tiranga’ Prime Minister Narendra Modi-a’n a hawn niin AKAM hnuaia India-in zalenna a neih kum 75-na puala in tina hnam puanzar zar tura beihpui thlakna a ni.
He beihpui thlakna hi Indian zingah a tla nain mi tam takin an inah Hnam Puanzar an zar a. Beihpui thlakna hi a hma zawnga Hnam Puanzar hi a zarna tur leh hmun pawimawh bika zar a nih thin piah lamah mipuiin amahni nen inzawmna thuk zawk an neih theih nana tih a ni.
AKAM hi March 12, 2021 khan hawn niin ramin zalenna a neih champha kum 75-naah chawlhkar 75 a tling dawn chiah a ni.
Inrinni khan Jammu & Kashmir Light Infantry Regimental Centre, Chinar Corps-a mite chuan Independence Day pualin AKAM hnuaiah live band performance an lantir tawh a, hei hi Kashmir-a remna leh muanna thehdarha a awm theih nana an tih a ni.
Independence Day lawm tura inbuatsaihna kal zelah Central Reserve Police Force chuan Zirtawpni khan Budgam-ah walkathon rally lian tak an lo huaihawt tawh.
Walkathon rally hi CRPF 181 battalion hnuaia neih a ni.
‘Har Ghar Tiranga’ beihpui thlakna chi khat atan hian Inrinni khan Indo-Tibetan Border Police (ITBP) chuan tualchhung mi leh biakzina kalte nen Badrinath Tiranga yatra an huaihawt bawk.