Kumin fur ruah tui tla nasa avangin Mizoramah khuarel chhiatna hrang hrang a thleng a, hmun 352-a chhiatna thlengah in 83 a chhia a, lirthei 16 chhe bawkin mihring thi erawh an awm lo.
Disaster Management & Rehabilitation (DM&R) department hotuten The Zozam Times an hrilh danin June 4 atanga August 6 chhung khan fur ruahtui tla nasa avangin chhiatna hrang hrang - lei min, lung tla, lungrem chim, tui lian leh lei khi te a thleng a, chung zingah chuan lei min a tam ber a, ni 64 chhungin hmun 211-ah lei a min.
Ni 64 chhung khan khuarel chhiatna hrang hrang thleng avangin mihring inhliam 10 awmin nunna chân erawh an awm lo a. Chenna in chhia 83 awmin chhungkaw 61 chu hmun him zawkah sawn chhuah an ni a. Khuarel chhiatna hian lirthei ke hnih nei 10 leh lirthei ke li nei paruk, a vaiin 16 a tichhia a ni.
Kumin fur chhunga khuarel chhiatna thlen tamna ber chu Aizawl district a ni a, hmun 118-ah chhiatna hrang hrang thlengin, a dawttu Serchhip district chhunga hmun 104-ah chhiatna a thleng a ni.
Khuarel chhiatna hrang hrang thleng tuartute chu State Disaster Response Fund atangin tanpuina pek thin an ni a, DM&R department chuan kumin February 15 khan district 11-a District Disaster Management Authority (DDMA)-te chu SDRF sum a pe a, sum a pek zawng zawng hi Rs 2,73,00,000 a ni a, hetihlai hian DDMA hian an sum dawn hi eng zat tak nge an hman ral tawh tih erawh hriat theih a la ni lo.