Hachhek bialtu MLA Lalrindika Ralte chuan 4th IR Battalion Headquarters chu Luangpawl, Mamit anga sorkar thuchhuaha tar lan a ni chu en nawn leh turin a ngen.
Thuchhuah a siamah Lalrindika Ralte hian August 12, 2022-a Mizoram sorkar thuchhuahin Lungpawl, Mamit chu 4th IR Battalion Headquarters anga tar lan a ni hian a thawng hle tih sawiin, Mizoram sorkarin 4th IR Battalion headquarters atan a bial chhung, Hachhek constituency-a mi, Rengdil hi official-in a puang tawh a, a hmunhma tur pawh mi tlawmngaihten a thlawnin ram pe tawhin hetah hian building pawh sain, hmalakna eng emaw chen Mizoram sorkarin a kalpui tawh a. Tunah hian sipai pawh eng emaw zat an awm mek niin a sawi.
Lalrindika Ralte hian August 3, 2013 khan Rengdilah hian khatih laia home minister, R Lalzirliana’n 4th IR Battalion Headquarters lungphum a phum tawh tih sawiin, lungphumna hunah hian a hun laia Hachhek bialtu MLA Lalrinmawia Ralte, Parliamentary Secretary, Home pawh a tel tih a sawi bawk.
Hachhek bialtu MLA hian 4th IR Battalion headquarters atan Mizoram sorkarin a bial chhunga mi, Rengdil a puan fel vek tawh hnuah tun hnaia sorkar thuchhuah meuha Luangpawl, Mamit anga a tar lang chu tihsual palh a nih a rin thu sawiin, “Sorkar thuchhuah hi Hachhek bial mipuite leh tlawmngaia a thlawn a ram petute rilru na taka siam theihna a ni,” tiin, sorkar press release hi a tihdikna mipui hriata puang chhuak tur leh mipui hriat loha sorkarin 4th IR Battalion Headquarters chungchanga thutlukna dang a lo siam leh a nih pawhin zep loa Mizoram mipui hma a thu dik puang chhuak turin Mizoram sorkar a ngen tih a sawi.