Khawzawl district hospital-a thisen dahthatna tur -blood storage centre- chu Inrinni khan bialtu MLA, Deputy Chief Minister Tawnluia’n a hawng.
Khawzawl district Blood storage centre-ah hian thisen ml. 350 bag 160 vel a leng a. Medical officer leh Lab technician 1 ve ve in an enkawl ang. Bialtu MLA hmalaknain company pathum - Anusha Projects Private Limited, Shri Balaji Construction Company leh Dhariwal Buildtech Limited CSR fund Rs. nuai 5 theuh an dawng niin sorkar thuchhuah chuan a tarlang.
Bialtu MLA, Dy CM Tawnluia chuan thisen dahkhawlna Khawzawl district-in a nei ta chu lawmpuiin, sum thawhtu company pathumte leh a puitlinna tura tha, sum leh ngaihtuahna sengtu zawng zawng lawmthu a hrilh a. Khawzawl mipuite tan malsawmna an nih thu a sawi.
Dy. CM chuan Mizoram sorkarin mipuite an hrisel zawk nan ke a pen zel tih sawiin, inenkawlna hmunhmate a theih ang anga a thuamthat zel a nih thu a sawi a. State sorkar sum mai chuan thil tih zung zung a harsat thin avangin a țul anga sum dap thin a nih thu a sawi bawk.
Tawnluia chuan Inrinni vek khan Khawzawl district child protection unit (DCPU) office pawh Khawzawl Vengthar-ah a hawng a. Tunhnaia district hawn thar zinga DCPO office nei hmasaber an nih avanga Khawzawl district te a lawmpui thu a sawi.
Khawzawl District child protection unit office hi nikum August atang khan mimal in luaha bultan a ni a. Kumin April atang khan thawktu dah tan niin, June atang khan pangngai takin office an kal a, thawktu mi 12 an awm mek a ni.
Khawzawl DCPU hnuaiah hian statutory body pahnih - Child welfare committee (naupang venhim ngai leh tanpuingaite buaipuitu) leh Juvenile ju- stice board (naupang dan bawhchhiaa puhte chungchang buaipuitu) an awm a. CWC leh JJB member-te hi mimala thuneihna pek ni lo mahse, naupang case ngaihtuaha an thutkhawm lai erawh chuan first class magistrate power pek an nih thu sorkar thuchhuahin a tarlang.
CWC-ah chairperson leh member pali an awm a, karkhatah vawihnih thukhawm thinin, mumal taka kalpui a nih atanga tun thlengin case 30 an ziaklut tawh a, heng zinga 28 te chu chinfel tawh a ni.
JJB-ah Principal magistrate Judicial first class magistrate leh member pahnih an awm a, thla khatah vawihnih thutkhawm thinin, mumal taka kalpui a nih atangin case 5 an ziaklut tawh a, case 2 chinfel tawh a ni bawk.